Nivariaqqaarneq: Tasiilami aalisakkanik suliffissuassaq sanaartorlugu aallartinneqarpoq
Royal Greenland, suliffissuassamik sanaartortitsisuusoq piffissami sivitsulersumi utaqqiisaasumik aaqqiissuteqartarpoq. Maannali suliffissuassaq sanaartorlugu aallartinneqartussanngorpoq. Naalakkersuisut siulittaasuat, Múte Bourup Egede, aningaasaqarnermut akileraartarnermullu Naalakkersuisoq, Erik Jensen aammalu Royal Greenlandip siulersuisuisa siulittaasuat Maliina Abelsen nivariaqqaarnermi peqataapput.
Tasiilami aalisakkanut tunitsivissap toqqavissaa sapaammi 4. februar nivariaqqaarneqarpoq. Aalisakkanut tunitsivissaq Namminersorlutik Oqartussat ingerlatseqatigiiffiutaata, Royal Greenland A/S-ip sanaartortippaa.
Naalakkersuisut Siulittaasuat, Múte Bourup Egede, ullormi pingaartorsiorfiusumi Tasiilami najuulluni peqataavoq.
- Tasiilami aalisakkanut tunitsiveqarnissaq ukiorpassuarni kissaatigineqarpoq. Maanna sanaartorneqalerpoq. Siunissaq qaamasoq suli qaamanerulerpoq. Ineriartussaagut soorunami aamma nunatta kangiani, Múte Bourup Egede tusagassiuutitigut nalunaarummini oqarpoq.
Suliffiit ataavartussat pilersinneqassapput
Naalakkersuisut siulittaasuat ilimasaarivoq suliffissuassaq piareerpat ataavartumik suliffiit pilersinneqassasut.
- Aalisartut pisasi avammut tunineqarpata sulisartullu sulippata nunatta karsianut, minnerunngitsumillu illoqarfissinnut nunallu immikkoortuanut maanga pitsaasumik kinguneqassaaq. Taamaattumik Naalakkersuisut aalisakkanut tunitsiviliornissamut peqqusinerat inuiaqatigiinnut tamanut ajugaaneruvoq, Múte Bourup Egede oqarpoq.
Royal Greenland A/S-imi siulersuisut siulittaasuat, Maliina Abelsen, aalisakkanik tunitsivissap toqqavissaanik nivariaqqaartuuvoq.
Nivariaqqaartoqareermat Tasiilami inuttaasunut tamanut katersortarfimmi kaffillertoqarpoq.
Inatsisartut Inuussutissarsiornermut Aatsitassanullu Ataatsimiititaliaanut ilaasortat Kommuneqarfik Sermersuumilu qinikkat aamma peqataapput.