Noma Spaniamiut neriniartarfiannit qaangerneqartoq

Restaurant Noma nunarsuarmi neriniartarfiit pitsaanerpaartaatut inissisimajunnaarpoq. Tusagassiiviit arlallit allapput Spaniamiut El Pais-iat tusarfittut innersuullugu allapput.

Kikkut ajugaanerannik allattukkat unnummut kingusinnerusukkut aatsaat saqqummiunneqartussaagaluarput aviisilli allattukkat qanoq isikkoqarnerat paasitissimavaat.

Ukiuni pingasuni tulleriiginnarni Noma nunarsuarmi neriniartarfinnit pitsaanerpaatut nersornaaserneqartarpoq Restaurant Magazinep 'The World's 50 Best Restaurant', toqqaasarnerat naapertorlugu.

Pitsaanerpaamut tullersortaasariaqarpoq

Danmarkimi neriniartarfik nunarsuarmi tamalaanit ilisimaneqartoq ataasinngornermi unnukkut Spaniamiut neriniartarfianit El Celler de Can Roca-mit ajugaaffigineqarpoq, ukioq manna kikkut pitsaanerpaanik nerisassiortarnersut Londonimi The Guildhallimi suaarutigineqarpata, El Pais allappoq.

2013-imi toqqaanermi Noma nummer 2-tut inissippoq, Spaniamiut nunarsuarmi pitsaanerpaanngortut ukiuni marlunni siullerni inissisimaffigisaraluannut.

Noma saniatigut Østerbromi neriniartarfik Geranium aamma neriniartarfiit pitsaanersaasa 50-it akornanniippoq.

Neriniartarfimmi iggaviup pisortaa Rasmus Koefoediuvoq marsimilu neriniartarfik Michelinimik ullorialerneqarpoq, taakkua aamma ukioq manna iluatsitsillutik Restaurant Magazinep allattugaataani 48-mit 45-mut qullarlutik.

Pitsaanersiuisarneq aqqanilissaat ingerlanneqarpoq.

Naliliisartut katillutik 900-uupput taakkua aalajangertarpaat nunarsuarmi neriniartarfiit sorliit pitsaanerpaatut allattukkamiilernissaat. Toqqaasarneq 2002mi aallartinneqarpoq Londonimeersumit Restaurant Magazine.

Naliliisartut tassaapput tusagassiortut, igasut, neriniartarfiutillit aamma pitsaalluinnartunik nerisassiortartut nunani 26-ni agguataarsimallutik.