Norge-mi uuliamik nassaartoqaqqippoq

Qaammatit qulingiluat ingerlaneranni Statoil aappassaanik annertuumik uuliaqarfimmik nassaarpoq. Barentshavemi sumiiffimmi Skrugard-ip tunisassiornissaminut akuerineqarfiani maannakkut suliariniagaq Havis iluatsitsiffiuvoq.

Nalilersuinerit kingulliit naapertorlugit, Skrugard-imi Havis-imilu nassaarineqartunit uulia nappartat 400-600 miliuunit tunisassiarineqarsinnaassapput.

- Qaammatit qulingiluat ingerlaneranni Barentshavemi aappassaannik uuliamik Havis nassaarfiuvoq. Maanna nassaarineqartoq Skrugardimi nassaarineqartup annertoqqatigingajappaa. Skrugardimi Havisimilu nassaarnikkut avannarpasinnerusumi uuliamik tunisassiorfiliorsinnaalerpugut, ingerlatsivimmi pisortaq Helge Lund, Statoil, oqarpoq.

Havisimi nassaarineqartoq Skrugardimi siorna apriilimi nassaarineqartumit kilometerinik arfineq marlunnik ungasitsigivoq. Havis tunisassiorfigissallugu akuersissuteqarfimmiippoq, uuliaqarfilli immikkoorluni.

- Skriugardimiinnaq nassaaq tunisassiulernissamut aallaavigissallugu naammappoq. Maannalu Havisimi nassaaq ilanngullugu suli annertunerusoq aallaaviusinnaanngorpoq. Norgep nunavittaani tunisassiornissamut Barentshavemi nassaarineqartut tunngavigalugit piviusunngortitsisinnaalerpugut, Erik Strand Tellefsen, Statoil-ip Skrugardimi pisortaa oqarpoq.

Norgemi uuliaqarfiit allat nassaarineqarput
Statoil tunisassiornissaminut akuersissummi PL532-imi nammineq 50 procentimik piginnittuuvoq. Eni Norge 30 procentimik kiisalu Petoro AS 20 procentimik piginneqataapput.

- Skrugardimi Havisimilu nassaarineqartut tunisassiornerup ineriartortinnissaanut pingaaruteqarput pilersuisunillu suliassaqartitsinerulissallutik. Tamanna suliffissanik nutaanik pilersitsinermik kinguneqassaaq sumiiffimmilu toqqaannanngikkaluamik sunniuteqassalluni, Helge Lund, Statoilimi pisortaaneq qularani oqarpoq.

Barentshavemi nassaarineqartut saniatigut ukiuni kingullerni Norgep kitaani qangaaniit tunisassiorfigineqartumi, imaarutilersorisaraluami, uuliamik annertuumik nassaartoqartareerpoq.

/ritzau/NTB