Norgemut aalisarneq pillugu isumaqatigiissut allanngunngilaq
Aalisarnermut Piniarnermut Nunalerinermullu Naalakkersuisoqarfik Kalaallit Nunaata aamma Norgep 2019-imut aalisagartassai pillugit isumaqatigiissuteqarput.
Kalaallit Nunaata aamma Norgep 2019-imut aalisagartassat pillugit isumaqatigiinniarnerat atorfilittanit Københavnimi uuma qaammatip aallartinnerani ingerlanneqarput. Illuatungeriit isumaqatigiissuteqarput 2018-imi isumaqatigiissut allannguuteqartinnagu 2019-imi ingerlateqqiinnarniarlugu.
Namminersorlutik Oqartussat tusagassiuutinut nalunaarummi taama ilisimatitsipput.
Kalaallit Nunaat taamaalilluni Barentshavemi saarullinnik, misarnanik saarulliusaanillu aalisarsinnaavoq, Norge Nunatta Kitaani Tunumilu qaleralinniarsinnaassalluni.
- Norgemik 2019-imut isumaqatigiissuteqarneq Aalisarnermut Piniarnermut Nunalerinermullu Naalakkersuisoqarfimmit aamma aalisarnermik inuussutissarsiuteqartunit naammagisimaarneqarpoq, nunatsinnut naleqartinneqaqaluni, Aalisarnermut Piniarnermut Nunalerinermullu Naalakkersuisoqarfik ilisimatitsivoq.
Isumaqatigiissut Kalaallit Nunaata aamma Norgep aalisarneq pillugu isumaqatigiissutaannik juunip qulingiluaanneersumik 1992-imeersumik tunngaveqarpoq. Isumaqatigiissut kalaallit Norgep imartaani 2019-imi aalisarnissaannut aamma norgemiut nunatta imartaani aalisarnissaannut tunngaviuvoq.
Ataani takuneqarsinnaavoq 2019-imut isumaqatigiissut, 2011-miit ukiumoortumik isumaqatigiissummut ilassutit kisitsisaannut sanilliullugu tonsinngorlugit:
