Nukappiaraalluni takorloortagaa piviusunngortoq

SAS-imi timmisartortartup 58-inik ukiullip Dennis Lynge Sørensenip meeraallunili takorloortagaa sapaatit akunnerata siuliani piviusunngorpoq. Taassumami timmisartorsuarmik Nuummukartarnissani takorloortuartarsimavaa.

Meeraagallarami Nuummi Børnehjemsvejimi, timmisartoqarfiusimasup ungasinngisaani, najugaqarnikuuvoq. Qulimiguulik S-61 mikkiartoraangat aallaraangalluunniit timmisartunik soqutigisaleeqqap Dennisip qaqqajunnamut majuarluni heliportimittut maskinarsuit isiginnaarujoortarpai – timmisartortartunngornissamik takorluugaq tassani pinngorpoq.

Dennisili qulimiguulinnik timmisartortartunngorusunngilaq. Danmarkimut feriaraangami ilaaffigisartakkamini SAS-ip timmisartorsuini aquttunngornissani takorluugaraa. Takorluuerusaartarsimavoq – nukappiaqqap eqqarsartaasii atorlugit Nuummi ullut ilaanni mittarfissuartaarnissaa sinnattuaqissutigerujoortarpaa, taamaalilluni timmisartorsuarmik Danmarkiliartaammik missinnaanngorniassagami.

Takorloortarsimasaa tallimanngormat piviusunngorpoq. Dennis Lynge Sørensen SK1294 aqullugu Nuup mittarfissuartaavanut nalunaaqutaq 14.39 mippoq – pilersaarutaasut minutsinik 20-nik sioqqullugit.

Qullilisoq

- Misigisaq angeqaaq – misigissuserpassuarnillu nassataqarluni, timmisartortartoq Sermitsiamut oqarpoq.

- Nuup mittarfiata illutaata saavanut unikkiartornitsinni kalaalerpassuit erfalasulisaarlutik tikilluaqqusisut takuneranni qullililaarpunga. Aquttarfiup igalaavisigut erlasorput atorlugu aamma akivagut.

Dennis Lynge Sørensen Nuummi inunngorpoq – meeraanerminilu takorloortagai amerlanerpaat tassani pinikuupput. Angutaatali suliffia pissutaalluni Aasianni ukiut sisamat, Maniitsumilu ukioq ataasoq aamma meeraanikuuvoq. Aasianni meeqqat atuarfianni Gammeqarfimmi Nuummilu Qorsussuarmi atuartuunikuulluni.

Taamani Grønlandsflyp Namminersornerullutillu Oqartussaasimasut timmisartortartunngorniarfik immikkut ittoq pilersitaani kalaallini siulliit ilaanniilluni timmisartortartunngorusunnerminik takorluuisarnini attattuarsimavaa.

Ukiuni siullerni ilaatigut Inuit-rakettimi timmisartortartuuvoq. Timmisartoq Cessna 550cCitation II-juvoq, taannalu Grønlandsflyp 1990-imiit 1992-imut atorpaa. Timmisartoq taamani Namminersornerullutik Oqartussani politikerini nuannarineqarluarmat taama taaneqartarsimavoq.

Timmisartorsuit pilerigigai

Taamaanngikkaangat Dash-7-inik timmisartuussinerit nunatsinni aquttuuffigisarpai. Nukappiaraallunili takorloortuartarsimasaa, tassa timmisartorsuarni aquttunngornissaq puigunngisaannarpaa.

- Grønlandsflymi 1998-imi suliunnaarama SAS-imi sulilerpunga, taamanili tassani sulivunga. Timmisartortitseqatigiiffiup timmisartuini A320-ni A330-nilu timmisartortartuuvunga, taamaattumik Grønlandsflymi suliunnaaramali timmisartut angisuut taakkua suliffigilernikuuakka.

SAS-ip Nuummut timmisartuussisarnera nutaaq maannamut aasaanerani taamaallaat pisarpoq, tamannalu Dennis Lynge Sørensenip ajorinngilaa.

- Kalaallit Nunaannut timmisartuussinerit annertuullutillu akisuujupput, silallu allanngoriataartarnerata kingunerisaanik pilersaarutit kalluarneqarsinnaasarlutik. Tamanna Nuummi mittarfittaami akuttunngitsumik misigineqartarpoq, Kalaallit Nunaannili sumi tamaani taamaappoq.

- Kalaallit Nunaanni timmisartornerup nuannequtaanut ilaavoq. Nuna kusanartorujussuuvoq, silali tamatigut ajunngittuaannanngilaq. Angerlarsimaffimmut qaqugu uteqqinnissaq ilisimaneqartuaannanngilaq. Tamanna sungiusimanngikkaanni paasiuminaassinnaasarpoq, Dennis Lynge Sørensen oqarpoq.

Kangerlussuarmukapallanneq

- Ullut ilaanni sulinngiffeqartunga Dash-7-imik Kangerlussuarmut utimullu timmisartupallaqquneqarpunga. Taamaaliupallariaannaallunga eqqarsarpunga. Ullulli sisamat qaangiummata aatsaat uteqqippunga. Aallaqqaninnimi Nuummi mittarfik matuvoq.

- Angalanermi tassani timmisartuussisinnaajunnaarnitsinni Kangerlussuarmi angut qallunaaq saaffiginnittarfimmut kamassimaqaluni suanngassisoq takuara.

- Nuummi utaqqivaannga, arlaleriarluni oqarpoq.

- Angutip utoqqaap qorsummik parkallip tuiisigut toortariarlugu ima oqarmat aatsaat eqqissivoq: Grønlandsfly oqarpat sila pissutigalugu timmisartuussisinnaanatik, taava timmisartuussisinnaanngillat. Qularissanngilat - Nuummut ornitavit aamma nalunngilluarpaat timmisartoq qangattarsinnaanngitsoq.

- Angut kamattoq ullut sisamat qaangiummata aatsaat Nuummut tikippoq, soorlu uanga timmisartup aquttua aamma taamaattunga.

- Pissutsit taamaapput. Timmisartortartup isumannaatsuuneq siulliullugu eqqarsaatigiuaannartarpaa, angutilli kamattup ilaasut isumannaatsumik apuunnissaat anguniartuaripput puigorpaa.

Dennis Lynge Sørensenip timmisartortartuunermini misigisarpassuaqarpoq oqaluttuarisinnaasaminik. SAS-illi timmisartorsuanik Nuummut qanittumi minnera misigisaani nuannernerpaavoq.