Nukissiorfiit aktieselskabinngornissani piumaneruvaa
Nukissiorfiit nammineq aalajangiissagaluaruni nukissamik pilersuiffik aktieselskabinngortinneqassaaq.
Taamatut Nuuk TV-mut erseqqissaavoq selskabip pisortaa Svend Hardenberg.
Taamatut nalunaaruteqartoqarpoq kommuneqarfiit selskabimik piginneqataanissamik kissaateqarnerannut atatillugu.
- Nukissiorfiit aktieselskabinngortinneqarnissaa piumaneruara, pissutigalugu tamatumuunakkut pilersaarusiornissatsinnut isumannaallisassagatta, taarsigassarsiniarnissaq eqqarsaatigalugu. Ullumikkut taamaallaat ukiukkaartumik landskarsimit taarsigassarsisinnaavugut. Kommunit selskabi tigussappassuk taavalu aggulullugu, taava pisariillisaasoqarsinnaanngilaq, marloqiusamilli sulisoqalissalluni, tassa kommunini selskabini ataasiakkaani tamani sulisunik qitiusumik inissisimasunik immikkullu ilisimasalinnik pisariaqartitsisoqassammat, Svend Hardenberg tv-utileqatigiiffimmut oqarpoq.