Nukissiorfiit: Aningaasaliinerit annertuut pissapput
Nuup eqqaani Utoqqarmiut Kangerluarsunnguini erngup nukiganik nukissiorfiup annertusarneqarnissaanut aamma Qasigiannguit Aasiaallu eqqaani erngup nukiganik nukissiorfiliornissamut politikkikkut aalajangertoqarsimanera nuannaarutigaa.
Nukissiuuteqarnerup iluani Nukissiorfiit ukiut tullii aningaasaliingaatsiartussaapput.
Nuummi Utoqqarmiut Kangerluarsunnguini erngup nukiganik nukissiorfiup allilerneqarnissaa, kiisalu Aasiaat Qasigiannguillu akornanni nukissiorfiliornissaq politikkikkut aalajangerneqarsimavoq.
Nukissiuteqarnermut pisortaq Kaspar Mondrup Sermitsiaq.AG-mut oqaluttuarpoq tamanna aningaasaliinermik annertuumik pisariaqartoq:
- Suliniutinut marluusunut taakkununnga aningaasat 3 milliardit koruunit sinnerlugit atorneqartussatut naatsorsorneqarsimapput. Aningaasaliinerit ukiuni arlalinni pissapput, Kaspar Mondrup oqarpoq.
Nuummi aamma Aasianni Qasigiannguanilu erngup nukiganik nukissiorfeqalernermi dieselimik atuineq ukiunut 20-nut naatsorsuullugu 500 milliuunit liiterinik annikillisinneqarsinnaavoq. Ukiumut agguaqatigiissillugu annikilleriaat 25 milliuunit liiteriupput. Tamanna isumaqarpoq nunatsinni CO2-mik ukiumut aniatitsineq 60.000 tonsinik annikinnerulersinneqarsinnaasoq.
Ajutoornermi pilersuigallartussat ukkatarineqalersut
Nuummi novemberip naanerani qulliit akunnerni 18-ini qamittooqqammata Nukissiorfiit oqartussallu susassaqartut allat upalungaarsimasutut sulilerput. Nuummiut ulluni tulliuttuni innaallagiamik sipaassasut kaammattorneqarput, ajornartoornermi innaallagiamik pilersuineq naammattumik pilersuisinnaaqqullugu.
Kaspar Mondrupip erseqqissarpaa taama pisoqarnerani nuna tamakkerlugu ajornartoornermi pilersuisinnaaneq politikkikkut eqqumaffigineqalersoq.
- Pingaaruteqarpoq oqaatigissallugu Nuummi decemberip aallartinnerani qulliit qamittoormata pilertortumik aaqqiissuteqarallarnerput. Aamma nunamut tamarmut pingaaruteqarpoq oqaatigissallugu, taama pisoqarnerani nuna tamakkerlugu ajornartoornermi pilersuisinnaaneq politikkikkut eqqumaffigineqalermat, Sermitsiaq.AG-mut oqarpoq.
Aningaasaqarneq aaqqinneqassasoq
Nukissiorfiit nuna tamakkerlugu pilersuisussaatitaanerminni isertitaqarnerat aningaasartuuteqarnerannut matussusiisinnaasimanngilaq. Taamaammat aserfallatsaaliuinermut aamma nutaanik pilersitsinermut aningaasartuutit malinnaasinnaanngillat.
Nukissiorfiit 2020-mi 153 milliuunit koruuninik amigartooruteqarpoq.
- Tamanna tassanngaannartumik pinngilaq, ukiut kingulliit arlallit taama pisoqarnissaa tikikkiartuaarsimavarput. Politikkikkut aalajangerneqartussaavoq qanoq aaqqinneqassanersoq. Ilisimavara Naalakkersuisut pissutsinut eqqummaarinnittut, Kaspar Mondrup oqarpoq.
Nukissiorfiilli erngup nukigata saniatigut allanik ataavartunik nukissiutinik ukioq manna pilersitsisimapput. Soorlu seqerngup qinngorneranit nukissiuutit. Sumiiffinni sisamani 2021-mi atulersitsisoqarpoq:
Qeqertat 48,75 Kw
Ittoqqortoormiit 58,5 Kw
Eqalugaarsuit 60 Kw
Qeqertarsuatsiaat 97,5 Kw
Nukissiuut katillugu: 264,75 Kw