Nukissiorfiit annertuumik amigartooruteqarput
Nukissiorfik imermillu pilersuinermik ingerlatseqatigiiffik 2020-mi 153 millionit koruuninik annaasaqarpoq.
Namminersorlutik Oqartussat nukissiuutinik imermillu pilersuinermut ingerlatseqatigiiffiutaat Nukissiorfiit ajornartorsiorpoq. Pisariillisaasoqaraluartoq 2020-mi 153 millioninik amigartooruteqarnini, ingerlatseqatigiiffiup ilisimatitsissutigaa. Assigiimmik akeqartitsineq aningaasaqarnerup ajortumik inissisimaneranut pissutaasut ilaattut, Nukissiorfiit oqaatigaat.
- Assigiimmik akeqartitsinerup 2018-imi atuutilersinneqarnerata kingornatigut, tamanna Nukissiorfiit aningaasaqarnerannut unamminartoqarsimavoq.
- Nukissiorfiit 2020-mi innaallagissamik nioqquteqarnermini illoqarfinni nunaqarfinnilu 68-iusuni 63-ini amigartooruteqarpoq, imermullu tunngatillugu illoqarfinni nunaqarfinnilu 66-iusuni 63-ini amigartooruteqarpoq, suliffeqarfik tusagassiuutinut nalunaarummi allappoq.
Pisortaq: Inissisimaffik nalorninarpoq
Nukissiorfiit aningaasartuutai suliffeqarfiup isertitaanit amerlanerupput aamma aningaasat naammanngillat atortunik naammaginartumik aserfallatsaaliuinissamut, tamatumalu kingunerisaanik maannakkut annertuumik kinguaattoorneq aallartikkiartorluni, tamanna ilanngullugu oqaatigineqarpoq, tamatumalu saniatigut Nukissiorfiit nunap karsianit akilersukkaminit amerlanernik taarsigassarsisarpoq.
Naalakkersuisut suliffeqarfiup iluani aningaasaqarnerup kukkunersiorneqarneranik februaarimi akuersinerannut, Nukissiorfiit innersuussipputtaaq.
Nukissiorfiit pisortaanerata Kaspar Mondrupip inissisimaneq nalorninarnerarpaa:
- Nukissiorfiit nalorninartorsiorluni inissisimavoq tamatumani pisariaqarluinnarpoq piaarnerpaamik aningaasaqarniarnerup iluarsineqarnissaa. Taamatut ingerlaannassagutta akiligassat amerliartuinnassapput aamma pilersuinissamut qulakkeerinnissinnaaneq appariartulissaaq. Tamanna uagut akuerissanngilarput. Qujanartumilli piginnittuvut, Namminersorlutik Oqartussat, ajornartorsiutip annertussusia pillugu oqaloqatigilluartarpavut. Tamatta isumaqatigiippugut ajornartorsiut iluarsineqartariaqarnera pillugu, Kaspar Mondrup oqarpoq.
Nalikilliliinerit annertuut amigartoornermut pissutaasut
Nukissiorfiit amigartooruteqarneq aaqqissuussaanermut tunnganerarpaa – ingerlatseqatigiiffik pigisanik 206 millionit koruuninut nalikilliliissasoq, ukiumoortumik nalunaarusiami ilisimatitsissutigineqarpoq.
- Taakkunannga 206 mio. kr.-nit pingajorarterutai kisimik 2020-mut tunngapput, sinnerilu 2018-imut 2019-imullu tunngallutik. Nalikikkiliinerit taama annertutiginerat Nukissiorfiit amigartooruteqarfiusunik aningaasaliinerinik, nuna tamakkerlugu Nukissiorfiit pilersuinerannik ingerlatsiumalluni aningaasaliissutigisariaqagaanik pissuteqarpoq, pisortaq Kaspar Mondrup ukiumoortumik nalunaarummi allappoq.