Nukissiornermut akigititat pillugit nalornineq ernumassutaasoq
Illuni nukissiornermik pitsanngorsaanissamut taarsigassarsiniartartut amerliartuinnarneri Grønlandsbankenimi malugineqarsinnaavoq, tamannalu ilutigalugu nukissiornermut akigititat qaffakkiartorneri inissianik pisiniartunut apeqqutaajartuinnartut, inuinnarnut sullissinermut pisortaq oqaluttuarpoq.
KNI ikummatissanut akigititanik aalajangersimasumik isumaqatigiissuteqarnera peqqutigalugu, Kalaallit Nunaanni ukiuni kingullerni marlunni aningaasat naleerukkiartornerat allanut naleqqiullugu annikippoq. Nunarsuup sinnerani nukissiornermut akigititat qaffariarujussuartut, nunatsinni pissutsit allanngungaanngillat.
Nunat tamalaat akornanni nukissiornermut akigititat eqqissiviilliutaaneri, inissiaatilinnut inissianillu pisinianut sunniupput.
Taama Grønlandsbankenimi sullitanut inuinnarnut pisortaq, Jimmi Johannesen, Sermitsiaq.AG-mut oqaluttuarpoq.
- Nukissiornermut akigititat pillugit susoqalernersoq pillugu atuisutsinni nalorniartuinnarneq malugisinnaalluarparput.
Inuit sallangernerupput
- Nalornineq inunnik sallangernerulersitsillunilu, inissiamik pisinissamut isumaqatigiissummik atsiortarnerat siornatigutuulluni sukkatiginngilaq. Maannakkut inuit eqqarsaatigineruaat nukissiornermut akigititat qanoq kinguneqarsinnaanersut, Jimmi Johannesen oqarpoq.
Nukissiornermut akigititat qaffakkiartornissaannut naatsorsuutit bankip siunnersuisarnerani aamma ilaasalernikut, Johannesen oqaluttuarpoq:
- Pissutsit ilaannik qaqitsisalereerpugut. Uagut aamma ilisimanngilarput ikummatissaq pillugu isumaqatigiissut qanoq imaqarnersoq, mianersulaarlutali inuit aningaasat nammineq atorsinnaasaannik naatsorsuigaangatta piumasaqaateqartarpugut.
Sullitanut inuinnarnut pisortaq tassunga atatillugu oqarpoq ukiup ingerlanerani banki taarsigassarsianik allanngortitsisaqattaarsimasoq, inissianik piginnittut taarsigassarsiaminnik erniakitsumiit erniakkaamut allanngortitsinermikkut aningaasannassinnaasimallutik.
Sullitat nukissiutinik annikinnerusumik atuisunik perusupput
Sullitarpassuit inissiaminni nukissiutinik pitsanngorsaanermut aningaasanik atuissallutik aajangerpaat:
- Amerlasuut piujuartitsinissamik eqqarsaateqartut, soorlu ullutsinni pitsaassutsinut naleqqunnerusunik nukissiornermik aaqqiissutiliortut takusarpavut.
- Soorlumi amerlanerusut eqqumaffigineruleraat, assersuutigalugu kiassaatinik pumpemik ingerlasunik ikkussuillutik, illut oqorsaataannik pitsanngorsaallutik, nutaanik igalaalersuillutik assigisaannillu iliuuseqarlutik, Jimmi Johannesen oqaluttuarpoq.
Sullitanut inuinnarnut pisortaq naapertorlugu, nukissiutinik annikinnerusunik atuisunik isumaliutiginninnerit aamma biilinik pisiniarnermi malunnarnerulerpoq.
Ikummatissat pillugit akigititanik isumaqatigiissut nutaaq nunatsinni 2024-p aallartinnerani atuutilertussatut naatsorsuutigineqarpoq.