NunaGreen Bossep tunuareerneranit siulittaasussamik nutaamik nassaarpoq
Stine Bosse nunat tamalaat akornanni politikkimik suliaqarusukkami siulersuisuni atuuffimminit tunuarpoq. NunaGreenimi siulittaasutut atuuffiani paarlatsissaq Naalakkersuisunit maanna toqqarneqarpoq, tassalu Line Frederiksen.
NunaGreen A/S ullumi tallimanngornermi februaarip qulingiluaani immikkut ittumik ataatsimeersuarpoq, tassani Naalakkersuisut siulersuisut katitigaanerat allanngortippaat. Siulersuisuni siulittaasuusimasoq Stine Bosse, nunat tamalaani politikkimik suliaqarniarluni aalajangersimasoq, taarserlugu NunaGreen allamik siulittaasoqalerpoq.
Ukioq 2023-mi Moderaterne sinnerlugit Europaparlamentimut qinigassanngortinniarluni Bosse nalunaarsimavoq.
Siulittaasutunngortoq tassaavoq Line Frederiksen, siornatigut Tusassimi aningaasaqarnermut pisortaasimasoq, ilaatigut Arctic Umiaq Line A/S-imi aamma Amaroq Minerals Ltd-imi siulersuisuni ilaasortaaffeqareersoq.
Stine Bosse siulersuisunit tunuarnerminut atatillugu suliffeqarfiup siunissami ingerlanissaa qilanaaralugu malinnaaffigiumaarlugu.
- Nunaoil-ip NunaGreen-inngorlugu allanngortinnissaanut suliap ingerlanera pissaganarsimavoq pingaaruteqarlunilu. Ikummatissanik itsangasunik mingutsitsisunillu nunap ukkatarinninnera mingutsitsinngitsumik piujuartussamillu nukissiornermut allanngortinniarlugu, NunaGreen pilersinneqarpoq.
- Takorluukkat iliuuseqarninngortinnissaat sukkasuumik ingerlasimavoq. Aaqqissuussaaneq mingutsitsinngitsumik sanaartugassanik annertoorujussuarnik isumaginnissinnaasoq NunaGreen-ip sukkasoorujussuarmik ineriartortissinnaasimavaa, aammalu maannakkut nunami attaveqaasersuutinut suliniutit annersaasa ilaanik pilersaarusiorluni ingerlallualeruttorluni, Stine Bosse NunaGreenimit siulittaasuujunnaarnermini oqarpoq.
Ineriartornermut pitsaasumut qujasoq
- Stine ingerlatseqatigiiffiup pilersinneqarnissaanut patajaalluni siuttuusimavoq, aammalu ingerlatseqatigiiffiup sanaartugassanik suliassaqarnissaata qulakkeernissaanut tunngatillugu aalajangiisuulluinnartumik pingaaruteqarsimalluni. Stine Kalaallit Nunaata siunissami nunarsuarmi mingutsitsiviunngitsumi inissisimanissaanut tunngatillugu ingerlatseqatigiiffiup takorluugaannut titartaasuusimavoq, NunaGreenimi pisortaq Hans Ulrik Skifte oqarpoq.
Siulittaasumik nutaamik toqqaanermi suliffeqarfiup siulersuisui nutaamik Naalakkersuisunit katiterneqarput.
Siulersuisuni uku ilaajunnaarput:
- Stine Bosse
- Volinka Augustenborg
NunaGreenimi siulersuisut ima isikkoqalerput:
- Siulittaasoq Line Frederiksen
- Siulittaasup tullia Mikkel Krogh Søndergaard
- Inúnguak Pedersen Abelsen
- Morten Stilling
- Tove Dyre Palnum