Nunalerineq pillugu Siunnersuisooqatigiit nutaamik siulittaasortaarput
Naalakkersuisut Aka Simonsen Nunalerineq pillugu Siunnersuisooqatigiinni siulittaasussatut toqqarpaat. Siornatigut savaateqarsimasup suliassaq qilanaaraa.
Nunalerineq pillugu Siunnersuisooqatigiinni Aka Simonsen siulittaasunngussaaq.
Siulittaasuusimasup Natuk Lund Olsenip Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortatut atorfininnerminut atatillugu tunuartariaqarnerata kingorna tamanna pivoq.
Nunalerineq pillugu Siunnersuisooqatigiinnut siulittaasumik nutaamik Aka Simonsenimut toqqaanermi, inuussutissarsiorfik arnamik pikkorissumik sumiiffimmeersumik, inuussutissarsiorfimmut toqqaannaq attaveqaatinik katersuisinnaasumik qularnaarisinnaasumillu atorfinitsitsisoqarpoq.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik taama ilisimatitsivoq, aamma Naalakkersuisut Nunalerineq pillugu Pilersaarusiaq 2021-2030-mut aamma nalinginnaasumik nunalerineq inuussutissarsiutitut ineriartorneranut, Nunalerineq pillugu Siunnersuisooqatigiit atortussanngortitsinermut pingaaruteqartuunera pingaartippaat.
Siunnersuisarfik
Imminut pilersornermut nunalerinermilu inuussutissarsiornerup annertusarneqarnissaanut kiisalu, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik nunalerinermut qanillineratigut suleqataanissannut qilanaarluni, Aka Simonsen ilisimatitsivoq.
- Kujataaneersuunera savaatiliunikuunerput kiisalu Kujataani Nunaminertani aqutsisuuninni savaatillit ilaat, SPS (Savaatillit Peqatigiit Suleqatigiissut) aamma Nunalerinermik Siunnersorteqarfimmik suleqatigillualereerneri iluaqutaassapput, taanna oqarpoq.
Nunalerineq pillugu Siunnersuisooqatigiit Naalakkersuisunut siunnersuisuusarpoq, namminermit pilersitamit imaluunniit Naalakkersuisunit apeqquteqaateqarnermit apeqqutit qaqinneqarneratigut imaluunniit innersuussinikkut atuulluni.
Aka Simonsen UNESCO Kingornutassaqarfik Kujataani aqutsisutut/Site Manager-itut ulluinnarni atorfeqarpoq. Aka Simonsen takornarialerinermi ilinniagaqartuuvoq Inuiaat Kulturiat Oqaluttuarisaaneranullu kandidatitut ilinniakkani inaarsaleruttorlugu.