Nunalerineq: Savaaqqat akii ilanngullugit misissuiffigineqarlik
Savaatillit Peqatigiissut Suleqatigiiffianni siulersuisut siulittaasuat, Suulut Hansen kissaateqarpoq Neqi A/S-ip tunisassiarisartagai, pingaartumik savaaqqat akii qulaajaavigineqassasut.- Savaateqarfimmiit pisiniarfimmut aki ilaatigut sisamariaatinngortarpoq, taanna oqarpoq.
Suulut Hansen Qassiarsummeersoq savaatillit peqatigiissut suleqatigiiffianni siulittaasuuvoq. Taanna erseqqissaavoq nunalerinermik inuussutissarsiuteqartut pisariaqartilluinnaraat Neqi A/S-ip siunissami piuinnarnissaa:
- Siullermik erseqqissaatigissavara Neqi A/S pillugu pisut pillugit siulersuisuni ataatsimoorluta oqallisigilluarnissaa pisariaqartikkatsigu, tassa Naalakkersuisut tungaannit Neqip siunissaa pillugu iliuutsit aammalu oqaatigineqartoq Neqi allatorluinnaq siunissami ingerlasariaqarnerarlugu aammalu piginnittoqarnikkut allannguisoqarsinnaanerarlugu oqaatigineqartut sukumiisumik paasisaqarfiginissaat pisariaqartikkatsigu, taamaammat siulersuisut sinnerlugit annertunerusumik oqaaseqarsinnaanngikkallarpunga. Taamaattorli qularutissaanngitsumik oqaatigisinnaavara soorunami Neqip ingerlaannarluni siunissaa qulakkeerneqassasoq assorsuaq tungitsinnit soqutigisarigatsigu, tassami taanna piunngippat, savaaqqat allallu tunisassiaasartut tunitsivissaarussammata, taanna erseqqissaavoq.
Tassunga tunngatillugu Suulut Hansen-ip Kalistat Lund isumaqatigaa Neqi A/S-ip ingerlanneqarnera aaqqissuussaaneralu allanngortinneqartariaqartoq.
Kikkut qanoq annertutigisumik Neqip tunisassiai iluanaarutigisarpaat?
Suulut Hansen savaatillit tamaasa sinnerlugit maanna oqaaseqarsinnaanngikkaluarluni, taamaattoq erseqqissaaavoq apeqqut ataaseq savaatillit akornanni akissutissarserusunneqartartoq matumani saqqummiunneqartariaqartoq.
Tassaavorlu savaatillit Neqi A/S-imut tunisartagaasa akii.
- Assersuutigiinnarlugu savaaqqap neqaa kilomut 55 koruunilersillugu Neqi A/S-mut tunigutsigu, neqi taannarpiaq pisiniarfinnut pigaangami ilaatigut allaat sisamariaammik akeqalersinneqartarpoq. Tunisassiatta akiisa taamak qaffasitsigisumik pisiniarfinni akeqartinneqartarnerat pisisartunit isornartorsiorneqaqqajaasarpoq apeqqusersueqqajaasoqartarlunilu savaateqarnermik inuussutissarsiuteqartut taamarsuaq iluanaaruteqartarnersut. Taamaattorli aamma uagut nammineq paaserusuttarparput savaaqqap neqaa savaatilinniit pisiniarfimmut apuukkaangami kilomut akeqartinneqarnera sooq taamak inissisimanersoq, Suulut Hansen erseqqissaavoq.
Taamaammat taanna isumaqarpoq Naalakkersuisut maanna toqoraavimmik Neqi A/S-imik annaassiniartutut suliaqarneranni Neqip tunisassiaanut pisiniarfinnilu pisiarineqartartunut akigitinneqartut ilanngullugit misissuiffigineqartariaqartut.
Savaateqarfiit qimatat uummarteqqinneqarlik
Suulut Hansen ilanngullugu oqaluttuarpoq savaateqarnermik inuussutissarsiuteqartut ikiliartuinnartut. Tamatuma malitsigisaanik aamma illuutit nunallu nunagissakkat qimanneqarsimasut atorneqaratik aserfallakkiartuinnartartut. Tamanna pivoq uffa savaatillit tunisassiaat nunatsinni piumaneqarluaraluartut:
- Isumaqarpunga nunalerinermik uumasuuteqarnermillu inuussutissarsiuteqarneq siunissaqarluartoq, taamaattorli ernumananngitsuunngilaq savaatillit ikiliartornerisa ilutigisaanik illuutit nunaminertallu naatitsivissatut nunagissakkat amerliartuinnarmata, pingaartumik aamma tunisassiaatigut piumaneqarluaraluartut. Aammami immini ersarippoq, Neqimut savaaqqanik allanillu tunisassianik tunisisartut amerlaneruppata aamma Neqi suliassaqarluarfiussaaq minnerunngitsumillu immitsinnut pilersornitta annertusarniarneqarneranut tapertaanerminik ingerlatsiinnassaaq, Suulut Hansen oqarpoq nangillunilu:
- Akissutissaqartinngilara qanoq iliornikkut savaateqarnermik allatulluunniit nunalerinermik inuussutissarsiuteqalerusuttut amerliartortinnissaat iliuusereriikkat saniatigut qanoq ingerlanneqarsinnaanersoq, taamaattorli isumaqarpunga taanna aamma qaqileriffigineqartariaqartoq, taamaaliornikkullu qulakkeerniarneqartariaqartoq savaateqarnermik allatullu nunalerinermik inuussutissarsiuteqartut ingerlalluarnissaannut tunngavissaasinnaasut ersarinnerulersinneqasssammata, Suulut Hansen erseqqissaavoq.
Sulinermi peqataanissartik naatsorsuutigaa
Suulut Hansen erseqqissaavoq savaatillit suleqatigiiffiat Neqi pillugu oqaasiinnartigut maannamuugallartoq saaffigineqarsimasoq aammalu akuutinneqarnissaanik neriorsuisoqarsimasoq, tamannalu Suuluup nuannaarutigaa:
- Neqip inissisimanera pillugu oqaasiinnartigut saaffigineqarnikuuvugut, naatsorsuutigaara ingerlatseqatigiiffiup siunissaa pillugu suleqataatinneqarumaarluta, tassami Neqi inuussutissarsiutitsinnik ingerlatsinitsinni pinngitsoorsinnaanngilarput aammalu soorunami soqutigaarput ingerlatseqatigiiffiup nutaanik tunngaveqarluni aammalu immaqa piginnittoqrnermigut allannguuteqaraluarluni ingerlaannarnissaa. Maannakkuugallartorli oqaaseqarfigisinnaanngilara savaatillit allatullu nunalerinermik inuussutissarsiuteqartut piginneqataalersinnaanissaat siunnerfiigineqassanersoq, tamannami suli isummersorfiginngilarput, savaatillit peqatigiit suleqatigiissut siulittaasuat, Suulut Hansen Qassiarsummeersoq oqarpoq.