Nunalerisut silarlummit eqqugaasut: Savaatillit ilaat 100-it sinnerlugit annaasaqarput
Savat savaaqqallu isumannaatsumut pissunniarnerinut atatillugu savaatillit assut iluaqutigisimavaat suliffeqarfiit arlalissuit ikiuunnerat. Maanna pisoq aqunneqarsinnaangajalerpoq, taamaakkaluartoq suli savat savaaqqallu appussaaqqasut arlaqarput, sulilu siusippallaarpoq apussuarmut uumasunullu kiisortunut savaatillit uumasuutiminik qanoq amerlatigisunik annaasaqarsimanersut kisitsisitalissallugu.
Savaatillit novemberip aallartilaarnerani pinngortitap nalaatassarititaanut iliuusissaaleqipput. Tamaviaarlutik ullorpassuit unnuttalersorlugit uumasuutitik apummit uumasunillu kiisortunit annaanniarsaralugit nukippassuarnik atuipput.
Taavali suliffeqarfiit innuttaasullu ikiuukkumallutik imminnut neqeroorutigipput. Inuussutissarsiuteqartut atortuutitik innuttaasullu uumasunik katerseqataanissartik neqeroorutigaat.
Savaatillit Peqatigiiffiit Suleqatigiissut siulittaasuat, Suulut Hansen oqaluttuarpoq suli savaatillit ilaat savaatiminnik angerlaassuisut, taamaammallu suli siusippallaartoq annaasat qanoq annertutiginersut:
- Ataaseq nalunngilarput, tassalu savaatillit ilaat uumasuutiminnik qulit ataallugit annaasaqarput ilaallu 100-it sinnerlugit apummut uumasunullu kiisortunut annaasaqarlutik. Tassami savaateqarfimmiit savaateqarfimmut eqqugaaneq assigiinngisitaarpoq, Suulut Hansen oqarpoq nangillunilu:
- Assut qujamasuutigaarput suliffeqarfiit inuillu ikiuukkumallutik neqerooruteqarnerat pillugu. Sermeq Helicopters aamma Air Greenland qulimiguulinnik nunarujussuaq qulaavaavaat uumasuuterpassuillu sumiissusersillugit, taamaalilluta pilertornerusumik angullugillu angerlaassinnaalerpagut.
Taamaattorli uumasut kiisortut periarfissarsisimapput savanik savaaqqanillu apussuarmit nikeriarsinnaanngitsunik saassussillutillu nerinissaminnut. Savaatillu annaasat ilanngullugit piaarneqarput uumasut kiisortut sumiiffinni pineqartuni utikajaannginnissaat pillugu.
Ikiuussinnaagamik qujamasupput
Pilu Nielsen, suliffeqarfimmik Sermeq Helicoptersimik pilersitsisuullunilu piginneqataasoq ajornartoorneq aallartiinnartoq ikiuunnissaq siunertaralugu suliffeqarfinnik ikiuussinnaasunik katersipallallunilu Nunalerinermik Siunnersorteqarfik suleqatigalugu savaatilinnut ataqatigiissaakkamik ikiuunnissamik pilersitsipput. Tassalu suliffeqarfiit inuillu ikiuunnissaminnut neqeroorutaat pilersinneqarluni.
- Qujanartumik iluatsilluarparput ataqatigiissaakkamik ikiuunnissarput, uagut qulimiguulitsinnik savat savaaqqallu sumiissusersiorpagut neriniartarfii qulaavaallugit, allat atortutik nunami angallassissutaasinnaasut atukkiuppaat, assersuutigiinnarlugu UTV-t nunakkut maniilakuluttukkullu angallatigineqarluarsinnaasut UTV-it. Maanna pisoq aqunneqarsinnaanngoriartoriarmat ikiuunnerput annikillivoq, kisianni suli savaatillit ikiorneqarnissaminnik pisariaqartitsissappata ikiussavagut, taanna oqaluttuarpoq.
Sermeq Helicoptersip ikiuunnerata saniatigut aamma Air Greenland ikiuuppoq, taanna qulimiguuliutimik ilaanik aquttuanillu neqerooruteqarpoq qulaavaajumalluni qulaavaallunilumi.