Nunaqarfiit ilinniartitsinikkut kivitsiffigaat
Namminersorlutik oqartussat 15 million koruuninik iluaqqutissinneqarput. Aningaasat nunaqarfinni atuartitsinermut qanoq iluaqqusiinissaat takuuk
15.650.000 koruunit.
Aningaasarpassuit danskit aningaasaateqarfiannit Kalaallit Nunaanni ilinniartitaanermi periarfissat pitsanngorsarnissaannut atugassiissutigineqarput, inuusutut nunaqarfinni pitsaanerusumik siunissaqarnissaannut periarfissiissallutik.
- Ajunngilluinnarpoq, Palle Christiansen, Inuussutissarsiornermut Suliffeqarnermullu Naalakkersuisoq aammalu Ilinniartitaanermut Ilisimatusarnermullu Naalakkersuisoq tamarmik tulluusimaaqalutik taama oqarpoq.
Naliginnaasumik iluaqutaasussamik aningaasaateqarfimmit Villumimit inuusuttut nunaqarfimmiut pikkorissarnissaminnut ikiorserneqarput. Aningaasaateqarfiup ilaatigut anguniagaraa ”ulluinnarni inuunermi atukkat pitsaanerusut”, taassumalu toqqarpaa 15.650.000 koruunit siunertamut tunniutissallugit.
- Villumip aningaasaateqarfiata aningaasat taama amerlatigisut tunissutigimmagit tulluusimaarnartorujussuuvoq. Nunaqarfinni inuusuttatta suliffeqanngitsut ilinniagaqanngitsulluunniit ingerlariaqqinnissaannut suliniutit aallarnisariikkatta amerlinissaannut periarfissaqalerpugut, aammalu tunissut suleqataasunut tamanut nersualaarinerivoq, Inuussutissarsiornermut Suliffeqarnermullu Naalakkersuisoq Ove Karl Berthelsen nuannaarluni oqarpoq.
Inuit 180-t ukiumi ataatsimi pikkorissarnerni
Aningaasarpassuit tunissutaasut ukiunut tallimanut naatsorsuussaasumi nunaqarfinni arlalinni atuaqatigiiaanik aqqaneq marlunnik 15-nik atuartulinnik pilersitsinernut atorneqassapput. Atuartut 10. klasse-p naliganik kalaallisut, qallunaatut, tuluttut matematikkimilu atuartinneqassapput, ukiullu naanerani misilitsissallutik.
Tamatuma saniatigut inuttut ineriartornermik ilinniartinneqassapput, ilinniartitaanermullu ilitsersorneqassallutik.
Inuit toqqarneqartut suliffeqalernissaat, ilinniakkamilluunniit aallartitsinissaat anguniagaavoq. Pikkorissarnermut isumassarsiaq Itillimi suliniummit iluatsilluartumit isumassarsiaavoq. Itillimilu suliniummut atuartut peqataasut maanna pikkorissarnermik kingunerisaanik suliffeqalerlutik, ilinniakkamilluunniit aallartsitsisimalerput.
Nunaqarfinni atuaqatigiiaanik amerlanernik aallartitsinissamut periarfissaqalernitsigut Itillimi misilittakkatta pitsanngorsarnissaannut ineriartorteqqinnissaannullu aamma periarfissaqalerpugut. Taamaalilluta misilittagariligarput nunaqarfinnut allanut siammaassinnaanngussavarput, tamannalumi iluatsitsinissamut aallaavissaalluarpoq”. Taama suliffeqarnermut politikkikkut ittuusoq Ove Karl Berthelsen, nassuiaavoq.
Paasissutissat annertunerusut uani pineqarsinnaapput
Naak nunaqarfinni inuusuttut pikkorissartinneqarnissaminnut pisariaqartitsisut tunissummit aningaasalerneqarsinnaasunit amerlanerugaluaqisut, nunaqarfimmi pikkorissartitsinissamik aallartitsinissamut piumasaqaatitaqarpoq.
Piumasaqaatit ilagaat suliniummik aallartitsinissamik pisariaqavittoqarnissaa, aamma piffimmi ilinniartitsinermik ingerlatsisinnaasumik najuuttoqartariaqarpoq.
- Pikkorissarnermut isumassarsiaq Itillimi suliniummit iluatsilluartumit isumassarsiaavoq. Najugallit namminneq suliniuteqaqataanerat iluatsitsinermut tunngaviuvoq. Taamaammat piumasaqaat taanna aalajangiisuusorujussuuvoq, Ove Karl Berthelsen oqarpoq - taanna aamma ukiuni aggersuni suliniutip ineriartortinneqqarnissaanut qilanaarpoq.