Nye ejere
Nunaqarfinni tunitsiviit ammaqqissapput
Illuutinik piginnittutut selskabimik, nunaqarfinni tunitsivinnik aqqanilinnik Maniitsumilu aalisakkanik suliffissuarmik piginnittumik, Greenland Venture kisimiilluni piginnittunngorpoq
Greenland Properties-imik tamakkiisumik piginnittunngornermigut Greenland Venturep maanna nunaqarfimmi tunitsivinnik aqqanilinnik Maniitsumilu aalisakkanik suliffissuarmik kisimiilluni piginnittunngorpoq.
– Aningaasaqarnerup ataatsimut illersorsinnaasumik nalilerneratigut maanna neriunartoqalerpoq tunitsiviit amerlanerpaartaat ammaqqinneqarsinnaassasut, Greenland Venturep pisortaa Karsten Høy oqarpoq.
Taanna nassuiaavoq isumaqatigiissummi tunitsiviit pineqartut ilaatigut Qaanaamiittoq, Maniitsumiittoq aammalu kitaani tunumilu nunaqarfinni arlalinniittut.
Pisineq aamma selskabip DayCatch-ip, piginneqataassumminik Greenland Venturemut tunisisup, nuannaarutigaa.
- Uannut piginnittuunertut DayCatch-imullu aalajangiisuulluinnarsimavoq tunitsiviit ingerlateqqinnissaat pisisup qulakkiissagaa, illoqarfinni nunaqarfinnilu, Greenland Propertiesip tunitsiveqarfiini, innuttaasunut iluaqutaasumik. Isumaga malilugu tunitsivinnut akisussaassummik inuiaqatigiit tiguseqqinnerat aalajangerneq eqqorluartuuvoq, nunaqarfinnilu innuttaasut tamatuminnga pilluaqqorusuppakka, DayCatch Greenlandip pisortaa Charles Kastberg Christensen oqarpoq.