Upernaviup nunaqarfiini pilersuineq
ajornakusoortoq Pilersuisoq Nunatsinni niuertarfeqarnerpaasoq, Kalaallit
Niuerfiannullu, KNI A/S-imut ilaasoq, nassuerpoq, Julianne Henningsen Heilmannili,KNI-mi
sulisoqarnermut, attaveqatigiinnermut piujuartitsinermullu pisortaq,
naapertorlugu pitsanngorsaasoqarnissaa sulissutigineqarpoq.
Tamannali ukiualunni ajornartorsiutaasoq
piffissap ingerlanerani ajorsiartuinnarpoq, Birgitte
Kamman Danielsen, Kullorsuarmi najugaqartoq, oqarpoq.
Upernaviup nunaqarfiini pilersuineq
ajornakusoortoq Pilersuisoq Nunatsinni niuertarfeqarnerpaasoq, Kalaallit
Niuerfiannullu, KNI A/S-imut ilaasoq, nassuerpoq, Julianne Henningsen Heilmannili,KNI-mi
sulisoqarnermut, attaveqatigiinnermut piujuartitsinermullu pisortaq,
naapertorlugu pitsanngorsaasoqarnissaa sulissutigineqarpoq.
Tamannali ukiualunni ajornartorsiutaasoq
piffissap ingerlanerani ajorsiartuinnarpoq, Birgitte
Kamman Danielsen, Kullorsuarmi najugaqartoq, oqarpoq.
Niuertarfinni ilisiviit imaqanngitsut
Kullorsuarmi Pilersuisoq aasaq naallugu
nioqqutissanik amigaateqarsimaqisoq Birgitte Kamman Danielsen oqarpoq.
- Nunaqarfinni pilersuineq
ajorluinnarpoq. Piffissami sivitsortumi ajornartorsiutaavoq, tassani
nioqqutissat ulluinnarni atorneqartartut soorlu qajuusat, sioraasat, immuit
margarinallu amigaataapput, ajorsiartuinnarpasillunilu.
- Aasaanerani sapaatit-akunneri
allortarlugit umiarsuaqartarnissaa pilersaarutaagaluartoq Upernaviup
nunaqarfiini Pilersuisumi ilisiviit imaqanngikulapput.
Pisiniarfiup nioqqutissanik
immikkoortiterinermut atortorissaarutaa ajoquteqartoq, taamaammallu piffissap
ilaani nioqqutissat ilaat nungussimasinnaasut Kullorsuarmi Pilersuisup
pisiniarfiani Juulip 25-ani allagarsiisoqarpoq. KNI-li pisiniarfiup immikkoortiterinermut
atortorissaarutip ajorneranit ilungersunarnerusumik ajornartorsiuteqarpoq,
Birgitte Kamman Danielsen isumaqarpoq.
- Pisiniarfiit
piffissami sivisuumi imaqannginnerannut pissutaasoq taannaannaasinnaanngilaq.
Ulluinnarni pisariaqartitat sapaatip-akunneri marluk missaannaannut naammattut
ukiuni kingullerni aasakkut nassiunneqartarput. Assersuutigalugulu manniit,
paarnat naatitallu annertussusaat naammanngikkajuppoq.
- Umiarsuarlu
silarlunera sikoqarpallaarneraluunniit pissutigalugu nunaqarfimmut
tulassinnaanngippat annertussutsit taakku qaammat qaangiuppat umiarsuup
neriuutigisamik tulaqqinnissaanut naammanngillat. Taamaammat KNI minnerpaamik
nioqqutissanik amerlanerusunik nassiussisariaqaraluarpoq, taanna oqarpoq.
Taanna naapertorlugu nioqqutissat ilaat
ukioq ataaseq sinnerlugu nungoqqapput, tamannalu nioqqutissanik
immikkoortiterinemrut atortorissaarutip ajorneranik taamaallaat
pissuteqarsinnaanngilaq, taanna isumaqarpoq.
Imassat aalisaatillu
Inuussutissaannaanngitsut Kullorsuarmi
amigaatigineqarput. Najukkani piniartut aammattaaq imassanik aalisaatinillu
assigiinngitsunik pissarsinissamik ajornartorsiuteqarput.
- Piniartut
inuussutissarsiorniarlutik taamaalillutillu ilaquttatik pilersorniarlugit
imassanik pisariaqartitsipput. Aallaasinut Kullorsuarmi atorneqarnerpaanut
imassat piffissami sivisuumi nungoqqapput. Pisiniarfinni sulisut
inniminniiuaraluarlutik oqartarput, imassalli tikinneq ajorput. Tamannattaaq
nioqqutissanut aalisatut piniartullu atorfissaqartitaannut, soorlu puisinut
qassutinut, atuuppoq, Birgitte Kamman Danielsen oqarpoq.
KNI Namminersorlutillu oqartussat
kiffartuussinissamut isumaqatigiissusiorsimapput nioqqutissallu
niuertarfinniittuaannartussat sorliuneranik allattorsimaffik niuertarfeqarfiit
nittartagaanni takuneqarsinnaavoq. Nioqqutissalli arlalippassuit Pilersuisumi
Kullorsuarmiittumi pigineqanngimamta KNI-p kiffartuussinissamut
isumaqatigiissutini eqquutsinngikkaa Birgitte Kamman Danielsen isumaqarpoq.
Pilersuinermi unammillernartoqartoq
Niuertarfeqarfik Upernaviup nunaqarfiinut
pilersuinermini unammillernartoqartoq Julianne Henningsen Heilmannip, KNI-mi
sulisoqarnermut, attaveqatigiinnermut piujuartitsinermullu pisortaasup,
nassuerutigaa.
- Kullorsuarmut nunaqarfinnullu
eqqaaniittutnut nioqqutissanik aasaanerani pilersuinermi unammillernartoqartoq
ilumoorpoq.
- Tamanna assigiinngitsunik
peqquteqarpoq. Siullertut siornatigut nalunaarutigeriikkatsitut nioqqutissanik
immikkoortiterinermut atortorissaarutitsinnik ajornartorsiuteqarpugut, tamannali
aaqqiviginikuuarput.
- Tullertut umiarsuit pajuttaatit
nunaqarfinni, matumanittaaq Kullorsuarmi, sikualoqarnera pissutigalugu
usingiarnissaminnik ajornartorsiuteqarnikuupput, taamaammallu nioqqutissanik
amigaateqartoqalerpoq, taanna oqarpoq.
Umiarsuaq pajuttaat piffissaq eqqorlugu
tulassinnaanngikkaangat Julianne Henningsen Heilmann naapertorlugu
sapaatit-akunneri marluk pallillugit kinguaattoortoqartarpoq.
- Nioqqutissat Tasiusamukartut
kukkunikkut allamut nassiunneqarsimasut ilaatigut paasivarput. Taamaammat
aasaanerani unammillernartoqarpugut, taanna oqarpoq.
Upernaviulli nunaqarfiinut nioqqutissanik
pilersuinerup pitsanngornissaa KNI-mit sulissutigineqarpoq, sumiiffinnilu
pineqartuni pisiniarfiit ilisivii nioqqutissanik maanna immerneqarsimalerput, Sulisoqarnermut,
attaveqatigiinnermut piujuartitsinermullu pisortaq naqissusiivoq.
Aallaasinulli imassat suli amigaataasut,
tamannalu iluarsiiviginiarneqartoq aamma ilisimatitsissutigaa.
