Ilulissani takornarialerisut nunaqavissut takornariartitsiviillu suliffeqarfiit annerit tassaasut Topas Explorer Group, Disko Line, Albatros Arctic Circlep aamma World of Greenlandip akunnerminni isumaqatigiinninnerat ukiuni kingullerni annertusiartorpoq, piffissamilu kingullermi takornariartitsisarfiup nutaap illoqarfimmi takornariartitsisartut qulingiluaasut pigisaataa Ilulissat Excursions ApS-ip suliffeqarfiit pineqartut piaaralutik nunaqavissunik suleqateqarumannginnerarlugit isornartorsiuisarnerata kingorna illuatungeriit isumaqatigiinnginnerat suli sakkortunerulerpoq.
Suliffeqarfiilli pineqartut isornartorsiuineq paasinngikkitsik oqaatigaat, akerlianilli Kalaallit Nunaanni takornariaqarfiit annersaanni nunaqavissunik takornarialerisunik pitsaasumik suleqateqarlutik isumaqarput.
Ilulissani takornarialerisut nunaqavissut takornariartitsiviillu suliffeqarfiit annerit tassaasut Topas Explorer Group, Disko Line, Albatros Arctic Circlep aamma World of Greenlandip akunnerminni isumaqatigiinninnerat ukiuni kingullerni annertusiartorpoq, piffissamilu kingullermi takornariartitsisarfiup nutaap illoqarfimmi takornariartitsisartut qulingiluaasut pigisaataa Ilulissat Excursions ApS-ip suliffeqarfiit pineqartut piaaralutik nunaqavissunik suleqateqarumannginnerarlugit isornartorsiuisarnerata kingorna illuatungeriit isumaqatigiinnginnerat suli sakkortunerulerpoq.
Suliffeqarfiilli pineqartut isornartorsiuineq paasinngikkitsik oqaatigaat, akerlianilli Kalaallit Nunaanni takornariaqarfiit annersaanni nunaqavissunik takornarialerisunik pitsaasumik suleqateqarlutik isumaqarput.
Isornartorsiuineq ilisarinngikkaat World of Greenlandimi Hotel Arcticimilu pisortaagallartup Morten Nielsenip taama isornartorsiuneq ilisarisinnaannginnerarpaa.
- Ukiorpassuarni nunaqavissut angalatitsisartut suleqatigilluarnikuuagut, taamaattumik piffissami kingullermi suleqatigiinneq amigaataasoq pillugu isornartorsiuineq tupaallaatigaara. Angalanerit 10 millionit koruunit missaannik nalillit tuniniartarpavut, taamaattumik oqallinnerup tassunga sangutinneqarnera mamiasuutigaara.
- Ukiorpassuarni maaniippugut, ukiullu tamaasa angalanerit neqeroorutigisarpavut, tassanilu assigiinngitsunik piumasaqaateqartarpugut, ilaatigut isumannaallisaanermut pitsaassutsimullu piumasaqaatinik, taakkualu angalatitsivinnut tamanut nassiuttarpavut, aamma angalanissanut taakkununnga kikkulluunniit neqerooruteqarsinnaapput.
- Uagut peqatiginata takornarialerisut namminneerlutik angallassinernik isumaginnissinnaalersimanertik peqqutigalugu, uagutsinnut isornartorsiulertut isumaqarpunga, taanna oqarpoq.
Eqi avissaartuutsisoq Topas Explorer Group World of Greenlandimut piginneqataassutai 2021-mi Air Greenlandip tamaasa pisiarai, tassungalu atatillugu World of Greenlandip Eqimi tammaarsimaarfimmut angallassisartunut Disko Line 2024 ilanngullugu kisiat atortassagaa isumaqatigiissutigineqarpoq. Isumaqatigiissullu ukioq manna naassaaq, tamatumalu kingorna Eqimut angallassinerit suliarinnittussarsiuunneqassapput. Eqimulli angalaniaraanni umiarsuit angissusiat umiatsiallu qanoq ittut atorneqartassanersut piumasaqaatigineqarpoq.
– Ukiuunerani angallannikkut unammillernartoqarnera pissutigalugu Qasigiannguani ukiuunerani aalisarneq qimusserlunilu angalanerit Ilulissanut
nuutissallugit pilersaarutigaarput, tassungalu atatillugu illoqarfimmi takornariartitsisartut atorniarpavut, Noelle Simoud Topas Explorer Groupimi
angallassinermut akisussaasoq oqarpoq.
Topas Angalatitsivik
- Eqimi imartaq sikuusorujussuusarpoq, taamaattumik Eqimukarniaraanni angallatit anginerusutinik aqqaneq-marlunnik amerlanerusunik ilaasoqarsinnaasunik peqarnissaq silatusaarnerussaaq, maannakkullu Disko Line kisimi umiarsuarnik taamaattunik peqarpoq.
- Angallatit mikinerit isumannaallisaanermut tunngatillugu atorsinnaanngilavut, aammattaaq angallatit taamaattut atorlugit angalanissaq ilaasutsinnit annilaangassutigineqarpoq, immaqali najukkami ingerlatsisut angallatinik anginerusumik pisinissaq soqutigissavaat.
- Kikkunnilluunniit mattussiniartoqanngilaq, kisianni qularnanngitsumik suliffeqarfiit ilaannaat Eqimut angallassisarnissamut neqeeroorsinnaassapput, taanna oqarpoq.
Angalanernut World of Greenlandip neqoorutaanut, soorlu Eqi-mut tunngatillugu angalatitsiviit nunani allaneersunut isumannaallisaanermut tunngatillugu angallatit anginerusut atorneqarnissaannik ilaatigut piumasaqaateqartut, taassuma ilanngullugu erseqqissaatigaa.
World of Greenland, Topas Travel, Disko Line aamma Albatros Travel takornarialerinermik annertuumik ingerlataqarnerat peqqutigalugu, najukkami takornarialerisut suliffeqarfiit taakkua pinngitsoorsinnaanngikkaat, taanna aamma isumaqarpoq.
Allamiuluarneq - Pisut tassunga saatinneqarnerat eqqarsaatigissagaanni allamiuluarneq uani immaqa aamma maluginiarneqarsinnaavoq, kisianni uagut maani nuannaralugu najugaqavippugut, taamaattumik tamaanga killittoqarnera ajuusaarnarpoq.
- Takornariat Ilulissanut tikittartut sinneruttumininnguit tigusaritsik pillugu Jan Cortsenip (Ilulissat Excursions ApS-imi pisortap) oqarnera eqqortuunngilaq, takornarissammi sunik misigisaqarusunnersut uagut aalajangerneq ajorparput, neqeroorutinullu tunngatillugu assigiinngitsunik piumasaqaateqartoqartarpoq, Morten Nielsen oqarpoq.
Nunaqavissut suleqatiginerisa saniatigut World of Greenlandip Disko Line aamma Albatros Travel atortarpai, tassungalu suliffeqarfiit taakku umiarsuarnik angisuunik ilaasulinnik angallassisarnerat peqqutaasoq, aammali Unique Tours assersuutigalugu Ilimanamut angallassinernut atorneqartartoq, taassuma erseqqissaatigaa.
- Taamaattumik sapinngisatsinnik kikkut tamaasa suleqatigisarpavut aamma arlaannattaluunniit akerlileriinnissaq kissaatiginngilaa, pisortaq oqarpoq.
World of Greenlandimi aasaanerani sulisut 40-t missaanniipput, taakkunannga 25-t missaat nunanit allanit tikisinneqartarput, sulisussallu amigaatigineqartut nunatsinni pissarsiarineqarsinnaasanngitsut, taassuma oqaatigaa.
- Sulisussat avataaniit tikisinneqartartut nunatsinni akileraarneq ajortut pillugit oqallinneq eqqortuunngilaq, suliffeqarfitsinnimi sulisunut tamanut akileraarutinut akiliisarpugut, Morten Nielsen erseqqissaavoq.
Taanna naapertorlugu World of Greenlandip suliffeqarfiit uku suleqatigai: Authentic Greenland, Unique Tours, Ilulissat Water Tours, Dogsled academy, Wonderful Ilulissat, Ilulissat Local Guide aamma Disko Line Explorer.
Tamanut inissaqartoq Ilulissani takornariartitsiviit illoqarfimmi sullissinissaminnut tamarmik inissaqartinneqartariaqartut, Topas Explorer Groupimi angalanerit pillugit akisussaasoq Noelle Simoud isumaqarpoq.
- Nunaqavissut takornarialerisut suleqatigiuarnissaat tamatigut anguniagaraarput. Disko Line Explorerimi neqeroorutigisinnaasavut killeqarput, takornariallu allamik misigisaqarusunnerugaangata nunaqavissut takornarialerisuinut innersuuttarpavut.
- Taamaattumik takornarianut misigisassanik assigiinngitsunik neqerooruteqarnerulerumalluta siunissami qaninnermi inuit najukkami najugallit suleqatiginerulerusuppagut, taanna oqarpoq.
Topas Explorer Groupip Disko Linellu piginnittui ataasiinnaapput, taamaattumullu suliffeqarfiit taakku marluk suleqatigiipput.
Aasaanerani suliffeqarfimmi sulisut 70 procentiisa missaat nunatta avataanit tikittartut, tamannalu sulisussat tamaasa nunatsinniit pissarsiarineqarsinnaannginneranik peqquteqartoq, Noelle Simoud oqarpoq.
Assigiimmik atugaqartut Albatros Arctic Circle aamma Hotel Hvide Falk suliffeqarfittut Avannaata Kommuniani nalunaarsorsimasut, taamaattumillu allatuulluni assinngiinngitsunik unammilligassaqartarlutik, najukkami suliffeqarfinnik pisariaqartitsineq naapertorlugu suleqateqartarlutik, suliffeqarfinni taakkunani pisortaanerup Troels G. Kristiansenip erseqqissarpaa.
Albatros Arctic Circle Ilulissat aamma Hotel Hvide Falk 65-it missaannik sulisoqarput, taakkualu affaasa missaat nunatta avataaneersuupput.
