Nunarput Norgelu imminnut qanilleriarput
Naalakkersuisut siulittaasuata Kuupik Kleistip (IA) Oslomut pisortatigoortumik tikeraarnermini Norgep nunanut allanut ministeria Jonas Ghar Støre (Ap) isumaqatigiissuteqarfigaa suleqatigiinnerup nukittorsarnissaanik.
Nukissiornermi avatangiisinilu nungusaataanngitsumik ineriartorneq qulakkeerniarlugu Kalaallit Nunaat Norgelu qaninnerusumik suleqatigiissapput aammalu nunat taakkua marluk imaani pisuussutit uumassusillit ingerlanneqarneranni suleqatigiinniarput. Kiisalu nunat inoqqaavisa kulturii pisinnaatitaaffiilu illersorniarpaat.
Tamanna erserpoq Norgemni illoqarfiit pingaarnersaanni Oslomi Norgep nunanut allanut ministeriata Jonas Gahr Størep (Ap) Naalakkersuisullu siulittaasuata Kuupik Kleistip (IA), ulluni pingasuni pisortatigoortumik Norgemut tikeraartup, ataatsimiinnerisa kingorna.
- Ataatsimut soqutigisarpassuaqarlutalu tulleriiaagassarpassuaqarpugut, angusaqarluarsinnaavugullu sammisaqarfinni pingaarutilinni ataasiakkaani annertunerusumik attaveqaqatigiinnitsigut itinerusumillu suleqatigiinnitsigut, Kuupik Kleist aamma Jonas Gahar Støre ataatsimut oqaaseqaamminni allapput.
Ministerit taakkua marluk isumaqatigiissutigaat Kalaallit Nunaat Norgelu Nunanut Avannarlernut Issittumullu atatillugu ataatsimoorussarpassuaqarlutik Taamaattumik Kuupik Kleist Jonas Gahr Størelu isumaqarput pissusissamisuussasoq sammisaqarfinni arlalinni suleqatigiinnerup annertusarnissaa, minnerunngitsumik uuliasiornermi avatangiisinullu tunngasuni.
- Nukissiorneq avatangiisillu Norgemi Kalaallillu Nunaanni nungusaataanngitsumik ineriartornermut imminnut qanimut ataqatigiipput. Suleqatigiinniarpugut siunertaralugu nukissanut ataavartunut nunallu ataaneersunut avatangiisinut malittarisassat pitsaasumik atornissaannik, ataatsimut oqaaseqaammi allassimavoq.
Norge Kalaallit Nunaallu siunissami pisuussutinik ineriartortitsinermi ingerlatsinermilu misilittakkanik taarseeqatigiittarniarput. Taamaattumik nunat taakkua marluk uuliamut oqartussaasui tamakkunatigut ineriartornerik illersorsinnaasumik nungusaataanngitsumillu suleqatigiilerniarput.
Kalaallit Nunaata Norgellu ukiumoortumik aalisarnermik isumaqatigiissutaat takussutissaapput immap pisuussutaanik atuinermi suleqatigiinnermut. Nunat taakkua marluk isumaqatigiipput nungusaataanngitsumik ingerlatsinermut tunngavik aamma atuutissasoq imaani miluumasunut, soorlu puisinut arfernullu.
Kiisalu Kleistip Gahr Størellu nunat inoqqaavisa kulturii pisinnaatitaaffiilu oqaloqatigiissutigaat, taakkualu suleqatigiinnissamik isumaqatigiissummi nutaami, ataasinngormat Oslomi ataatsimiinnermi isumaqatigiissutigineqartumi pingaarutilimmik inissisimapput.
Kuupik Kleistip marlunngormat norskit nutarterinermut, ingerlatsinermut ilageeqarnermullu ministeriat Rigmor Aasrud nunani avannarlerni suleqatigiinneq, nunat inoqqaavi pisortallu ingerlataasa nutarternissaat pillugit ataatsimeeqatigaa. Kuupik Kleistip Norgemut tikeraarnermini kingulliullugu tikeraassavaa Stavanger.
Norgemi illoqarfiit uuliamut attuumassutillit pingaarnersaanni Naalakkersuisut siulittaasuata pingasunngormat ataatsimeeqatigissavai nunami uuliasiornermi inuit nuimanerit, sisamanngorpat Danmarkimut timmisartunnginnermini, pisarnertut Kalaallit Nunaata Sinniisoqarfiani ukiortaami ilassinninnermi qaaqqusisuujartorluni.