Nuup Aalborgillu akornanni toqqaannartumik
timmisartuussisalerneq Kalaallit Nunaata Norgemiit
takornariartitsisalernissaanut ammaassisoq, Aalborgimiit Nuummut silaannakkut
aqqut nutaaq atuarlugu timmisartuusserngaarnermi ilaasut ilaat
Kristiansandimeersoq Målfrid Fossestøl isumaqarpoq.
- Norgep kujasissuani najugaqarluni biilerluni
Aalborgiliarneq timmisartumik Københavnimut angalanerminngarnit orniginarnerujussuuvoq,
taanna nassuiaavoq.
Nuup Aalborgillu akornanni toqqaannartumik
timmisartuussisalerneq Kalaallit Nunaata Norgemiit
takornariartitsisalernissaanut ammaassisoq, Aalborgimiit Nuummut silaannakkut
aqqut nutaaq atuarlugu timmisartuusserngaarnermi ilaasut ilaat
Kristiansandimeersoq Målfrid Fossestøl isumaqarpoq.
- Norgep kujasissuani najugaqarluni biilerluni
Aalborgiliarneq timmisartumik Københavnimut angalanerminngarnit orniginarnerujussuuvoq,
taanna nassuiaavoq.
- Ikaartaammut ilaalluni Hirtshalsiliarneq akunnernik
pingasuinnarnik sivisussuseqarpoq –Aalborgimullu aamma motorvejeqarluni. Usimaannalu
biilinik Aalborgip mittarfiani inissiineq Norgep mittarfiini
inissiinerminngarnit aamma akikinneroqaluni.
Målfrid Fossestølimmi ilinniartitsisuusup qangali
takorluukkani Nuummut timmisartornermigut piviusunngortippaa. Silaannakkullu aqqut
nutaaq ammarsimasoq tusaramiuk angalanissaminut inniminniilertorpoq.
- Nuummi sulisumik ikinnguteqarpunga – taassumalu Nuummiinninni tikeraartigissavaanga.
Marluulluta Kristiansandimi kristumiut arnartaasa peqatigiiffianni ukiut qulit
matuma siorna ilaasortanngorpugut, tamannalu Nuummut tikikereeruma malunnartissavarput.
Kikkut tamarmik Kalaallit Nunaat tusaamavaat
Målfrid Fossestøl silaannakkut aqqut nutaaq ammarsimasoq tusaramiuk angalanissaminut inniminniilertorpoq.
Assi: Jesper Hansen
- Norgemiummi tamarmik Kalaallit Nunaat tusaamavaat. Issittumimi
ilisimasassarsiortut ilarpassui Norgemiuupput, taakkualu meerartatta
atuartortaannit tamanit tusaamaneqarput.
Nunatta sermersuani ilisimasassarsiorluni sisoraatinik
1888-imi ituissimasuni siullerpaaq eqqissinermullu nersornaasiuttakkamik
nersornaaserneqarnikoq norgemiu Fridtjof Nansen, Målfrid Fossestølip eqqaavaa.
- Taassumatulli iliunngikkaluarluni aamma
misigineqarsinnaavoq. Taamaammat ingammik ikinngutima tikeraarnissaanut
Kalaallit Nunaannilu angerlarsimaffiata takunissaanut ulluinnarnilu
inuusaasiata misigisaqarfigilaarnissaanut qilanaarpunga. Tusaamasarpassuaqareerpunga,
kisiannili Nuummi portusuulianik illorsuaqartoq asfaltitikkanillu
aqqusineqartoq takorlooruminaatsillugu.
- Aammali sisorarfinnukarumaartugut ikinngutima
neriorsorpaanga, Målfrid Fossestøl oqarpoq.
Norgemi immikkoortortaq
neqeroorutissaqqissinnaasunik ujartuiniartut
Norgep kujasissuani inoqarfiit innuttunersaasa
marluusut, tassa Sørlandet aamma Østlandet, katillugit 2,7 millioninik
inoqarput. Taakkua Norgemi inuit amerlassusiisa affaraat.
Angalatitsivik Ruby Rejser silaannakkut aqqummik
pilerseqqammisaminik Norgemi nittarsaassinissaminut suli siunnerfeqanngilaq.
- Kisianni Norgemi immikkkoortortaqarpugut, tassa Ruby-rejser.no,
taamaammat neqeroorutissaqqissinnaasunik ujartuiniarpugut, angalatitsivimmi Ruby
Rejserimi pisortaq Morten Meyer oqarpoq.
Aalborgimiit Nuummut silaannakkut aqqut nutaaq
atuarlugu timmisartuusserngaarnermi ilaasut pingasunik Norgemiortaqartut,
taassuma aamma ilisimatitsissutigaa. Aamma marlunnik Finlandimiortaqartut,
ataasiakkaallu Tuluit Nunaanneersuusut, Irlandimeersuusut, Islandimeersuusut
pingasunillu USA-meersortaqarlutillu marlunnik Sverigemeersortaqarput. Kalaallit
Nunaanneersortaallu 13-iupput, sinnerilu 189-iusut Danmarkimeersuullutik.
