Nunarput takutitsinerit pingaarnersaanni
Vestnorden Travel Mart, nunatsinni takornariaqarnermik ingerlatsisunut angalanernik takutitsinerit pingaarnersaat, Akureyrimi ingerlanneqartoq ullumi naassaaq.
Kalaallit Nunaanni Takornariaqarnermik Inuussutissarsiornermillu Siunnersuisoqatigiit (GTE), nunap immikkoortuani takornarianik siuarsaanermik ingerlatsiviit takornariaqarnermillu ingerlatsisut 20 nunatsinni Danmarkimilu aallaavillit, katillugit inuit 40 sinnillit, Atlantikup Avannaani qeqertamut innermik anitsisartunik qaqqalimmut angalapput ingerlatsivitik 2011-mullu tunisassiatik nittarsaakkiartorlugit.
- Takutitsinerup ulluani siullermi video nutaaq nunamillu nittarsaassinissarput nutaaq takutippavut, namminerlu suleqatigisatsinnit nunanilu allani suleqatigisatsinnit tigulluarneqartorujussuupput, Anders Stenbakken, GTE-p pisortaanera, oqarpoq.
- Kalaallit Nunaanni takornariaqarneq ukiuni aggersuni a suli annertusisinnaalluarpoq, tunisassiatta ineriartortinnerat pitsanngorsarnerallu ilutigalugu, qularutissaanngilarlu nunani allani angalatitseqatigiiffiit Kalaalit Nunaat annertunerusumik tuniniarusukkaat. Tamanna soorunami siuarsarniassavarput nunap immikkoortuini suleqatigiinnerup annertusarneratigut, Anders Stenbakken nassuiaavoq.
Atlantikup avannaani suleqatigiinnissamut periarfissat sammillugit
Vestnordiske turistrådimi NATA-mi (North Atlantic Tourism Association-imi) siulittaasup Per Hansenip, Savalimmiuneersup, tusagassiortunik katersortitsinermi paasissutissiissutigaa takornariaqarnermik ingerlatsisut tamarmik nunat akimorlugit suliniutinut tapiiffigineqarnissamik periarfissat atorneq ajoraat. Tamanna maanna allanngortinniarneqalerpoq.
- Kalaallit Nunaat, Savalimmiut Islandilu ornitassaapput pingasut nalissaqanngitsut, takornarialli eqqarsaatigalugit nunarsuarmi tamarmi unnammillerneq annertusiartormat NATA suliniuteqalersimavoq takornariaqarnermik ingerlatsisunut anguniagalimmik.
Assersuutigalugu tullianik Vestnorden Travel Marteqarnissaani takutitsivimmik peqataasoqaqqinniarpoq, pingaarnerusumilli aamma nunatsinni, islandimi savalimmiunilu politikerinut siunnersuutigalugu siuniksami NATA-mut allattoqarfiliornissaat aalajangersimasunik sulisulimmik.
Vestnorden Travel Mart tallimanngorpat nerersuarnermik naggaserneqassaaq. Aappaagu angalanernik takutitsinissami Savalimmiut aaqqissuussisuussaaq, taannalu 2001-mi septembarimi ingerlanneqassaaq.