Nunatsinni aatsitassanik qaqutigoortunik piiavissaq siulleq
Australiamiut suliffeqarfiutaat Kalaallit Nunaanni aatsitassanik qaqutigoortunik piiaaneq siulleq Kangerluarsummi 2014 aallartissavaat
Nunat tamalaat suliffeqarfissuisa nunatsinni aatsitassarsiornermikkut milliarderpassuit pissarsiarisinnaassallugit naatsorsuutigaat.
Nunatsinni aatsitassarsiorsinnaasutut akuersissutilik Tanbreez aallartisartut siuttoraat. Taanna Australiamiut suliffeqarfiutaanit Rimbal'imit 100 procentimik pigineqarpoq, aatsitassanik ujaasisartumit ujarassiuumit Greg Barnes'imit pigineqarpoq, Berlingske allappoq.
Kangerluarsummi Narsap Qaqortullu akornanniittumi aatsitassarsiorfimmi suliareqqiivittalimmik, aqqusinermik umiarsualivimmillu pilersitsisoqarnissaa siunerataavoq. Aatsitassarsiorfik mineral'imik aappalaartumik eudialyt'imik aatsitassanik qaqutigoortumik akulimmik piiaavissaq pilersaarutit naapertorlugit 2014 aallartinniarneqarpoq. Aatsaat Kalaallit Nunaanni taamaattumik siullerpaamik ammaasoqaannarnavianngilaq kisiannili nunarsuaq tamakkerlugu aatsitassarsiorfimmik Kinap kisermaassineranut unammillertussamik aamma ammaasoqassaaq.
Geus'imi, Kalaallit Nunaata Danmarkillu naalagaaffiat sinnerlugu nunap sananeqaataanik misissuivimmit siunnersortaaneq Per Kalvig Berlingskemut naliliivoq, Kangerluarsummi aatsitassat qaqutigoortut nassaassat nunarsuarmi annerpaartaata tallimassarigaat.
Aatsitassat qaqutigoortut imaluunniit savimminissaq motorinik sanaartornermi saviup kajunngerisassaannik nukittoorsuarnik sanaartornerini atorneqartarput soorlu anorisaassualiornerni. Aatsitassat taakku aamma qulliit halogenit pæriinut, laserinut, smartphonesinik kiisalu fjernsyninik sanaartornermi atorneqartarlutik.