Nunatsinni cementi minguitsoq
Siunissami anorthosit sanaartornermi cementi taarserlugu atortuulersinnaavoq. Aamma glasfiberimi plastikimilu atorneqarsinnaavoq. Mingutsitsinnginnerusumik ingerlatserusunnerup immaqa kiisami anorthositimik piiaavik ingerlalluartilersinnaavaa.
Kangerlussuup eqqaani anorthositimik piiaavik pisinianit marlunnit annikitsumik pingaaruteqartumilli pisiniarfigineqarpoq: NASA-mit USA-mi avataarsualiarnermut ingerlatsivimmit aamma ESA-mit Europami avataarsualiarnermut ingerlatsivimmit. Tassami qaammat Nunatsinni anorthositsitut ittumik manngerluartumik sananeqaateqarpoq.
Avataarsualiartartut atortutik misileraraangatigit soorlu atisatik naammattumik ninngussuteqartut misileraanerminni anorthosit Nunatsinneersoq atortarpaat, sananeqaammi taamaattoq qaammammi siumugassaavoq.
Aviisi AG taama allappoq.
Bent Olsvig, Lumina Sustainable Materialsimi pisortaaneq taama oqaluttuarpoq, taannalu Qaqortorsuarmi (White Montain) anorthositimik piiaavimmik ingerlatseqatigiiffimmeersuuvoq.
Tamatuma saniatigut anorthosit annermik glasfiberimi qalipaammilu atorneqartarpoq. Sananeqaalli calciumfeldspatiusoq suliffissuaqarnikkut atuuffissarpassuaqarpoq.
Anorthosit avatangiisinik illersuinerulluni cementimut taartaasinnaalluarpoq, kiisalu plastikimik tunisassiornermi, Bent Olsvig oqaluttuarpoq.
Cement minguitsoq siunissami sanaartornermi pingaaruteqalersinnaavoq.
Maannakkorpiaq Luminami atuuffigisinnaasai assigiinngitsut misissorneqarput tamannalu immaqa Kangerlussuup eqqani piiaavimmut siuariaataasinnaavoq.
Cement minguitsoq
- Anorthosit cementimi imaluunniit plastikimi tunisassiornermi atorneqarnissaminut periarfissaqarluarpoq, Bent Olsvig naliliivoq.
Aviisimi AG-mi atuarnerusinnaavutit. Aviisi uani pissarsiariuk:
