AALISARNEQ
Nunatta Kangiani nipisanniarnermik misileraaneq
Tunup imartaani aalisakkat pisuussutillu allat misissuiffigineqarpiarnikuunngillat, pingaartumik sinerissap qanittuani peqassuseq ilisimasaqarfigerpiarneqanngilaq. Qangaaniilli Tunumi piniarneq inuussutissarsiutini annersaavoq, taamaattorli ukiuni qulikkaani kingullerni aalisarneq ineriartortinneqarpoq. Maanna Naalakkersuisut Tunumi sinerissap qanittuani nipisanniarnermik misileraanissamut ammaapput, misileraanerlu ukiup sinneranut ingerlasussaq qummut killeqartinneqassanngilaq.
Asseq: Naalakkersuisut
Misileraalluni nipisannik aalisarneq pilersinneqarpoq
Tasiilami aalisarneq pillugu apriilimi 2024-mi isumasioqatigiinnerup inernera
tunngavigalugu.
Misileraalluni aalisarneq Tunup sineriaata qanittua
tamaat killeqanngitsumik aalisarfigineqarsinnaasunngorlugu maajip 29-anni
2024-mi pilersinneqarpoq – aalisarnikkut oqartussaaffigisap killinga 3 sømil
tikillugu ukiup naanissaanut (31. december 2024) misileraasoqarsinnaalluni.
Misileraalluni aalisarnermi qassutit kisiisa
atorneqaqqusaapput, pisarineqartullu tamaasa, 100 procentit,
tunineqartussaatitaapput. Inuussutissarsiutigalugu aalisarneq pillugu inatsit
misileraalluni aalisarnermi tunngavigineqarpoq, (soorlu aamma nipisannut
qassutit nigartussusii, pisarisuukkanut maleruagassiat, tunisinermi
nalunaarsukkat il.il.)
Aalisarnermut Piniarnermullu Naalakkersuisoqarfik ilisimatitsivoq misileraanermut atortut nassiunneqarsimasut.
Sikorsuit ukioq manna akornutaaginnassappata
Aalisarnermut piniarnermullu naalakkersuisoqarfimmi aalisarnermut immikkoortortaqarfimmi AC-fuldmægtigi John Biilmann, misileraalluni aalisarnissap ammaanneqarnissaanut piareersaanermik ammaassereernermilu pivisunngortinnissaanut ataqatigiissaarisuusoq, oqaluttuarpoq Sermiligaarmiut Kuummiormiullu misileraanissaminnut maanna piareersartut:
- Kisianni sikorsuit misileraanermut akornutaasinnaapput. Maanna Tunup sineriaani assut sikoqarpoq, pinngortitarlu kisimi naalagaavoq misileraalluni nipisanniartussat iluatsissinnaassaneraat. Ukioq manna misileraalluni nipisanniarnissaq iluatsissinnaassanngippat, sulissutigissavarput aappaagu 2025-mi misileraanerup nanginneqarnissaa, taanna oqaluttuarpoq.
Pinngortitaleriffimmit nuannaarutigineqarpoq
Kalaallit Nunaanni Pinngortitaleriffimmi aalisakkanik qalerualinnillu immikkoortortaqarfimmi pisortaq, Helle Siegstad nuannaarpoq, Tunup sineriaata imartaani misileraalluni nipisanniarneq aallartinneqarmat:
- Nalunngilarput nipisaqartoq, kisianni taannatuaavoq maannamut uppernarsarsinnaasarput. Taamaattumik qilanaarivarput tunisinermi nalunaarutit logbogillu aqqutigalugit paasissutissanik pissarsisalernissatsinnut.
Pinngortitaleriffik misileraanissamut atatillugu qinnuiginninnikuuvoq aalisarnermit
paasissutissanik nassitsisoqartassasoq. Aalisarnissamut akuersissummik
qinnuteqaammi tamanna pillugu ilisimatitsissutigineqassaaq.
Tasiilap eqqaani
aalisarfiit nipisannik pisaqarfigineqartartutut ilimagineqartut annerusumik
ilaatigut paaserusunneqarput. Paasissutissat allanut
ingerlateqqinneqassanngillat, Aalisarnermut Piniarnermullu
Naalakkersuisoqarfimmut Pinngortitaleriffimmullu nipisanniarnermit
paasissutissat annerusumik ilisimasaqalersitsillunilu paasissutaassapput.
Pinngortitaleriffik tamatumunnga atatillugu piumasaqarsimavoq paasissutissanik nassiussuinissamut, taakkulu paasissutissat allagartaq ilanngunneqassapput licensimik tunniussinermi misileraanermut peqataarusuttunut.
Misileraalluni aalisarnermut tunngatillugu paasissutissat, qinnuteqaasiorfissaq aammalu peqataasinnaanermut piumasaqaatit SULLISSIVIK aqqutigalugu misissorneqarsinnaapput.
