Nunatta karsia isertitaqarpallaarunnaassaaq

2024-mut aningaasanut inatsisissatut siunnersuut naapertorlugu Namminersorlutik Oqartussat suliffeqarfiutaasa akiliutissaat ima agguataarneqarnissaat naatsorsuutaavoq:

• Tusass A/S: 82 millionit koruunit (32 millionit koruunit nalinginnaasumik iluanaarutit, 50 millionillu koruunit immikkut ittumik iluanaarutit).
• KNI A/S: 20 millionit koruunit
• Royal Greenland: 60 millionit koruunit
• Sillimmasiissut: 8,4 millionit koruunit, innaallagissamut akinik assigiisitsinerup kingunerisaanik ingerlatseqatigiiffiit sipaarnerinit.
• Katillugit: 170,4 millionit koruunit

Aningaasanut inatsimmi inaarutaasumi aalajangerneqarpoq ingerlatseqatigiiffiit ataasiakkaat qanoq pissarsiaqartinneqarnissaat allassimajunnaassasoq, aningaasalli tamarmiusut taamaaginnarput: 170,4 millioner koruunit.

Ingerlatseqatigiiffiit akileraarutaat

2024-mut aningaasanut inatsimmi aamma allassimavoq Royal Greenlandip Namminersorlutik Oqartussat suliffeqarfiutaannit akileraarutitigut akiliuteqarnerpaanissaa naatsorsuutigineqartoq.

- Pingaartumik KNI A/S-ip Royal Greenlandillu 2024-mi ukiullu tulliuttut ingerlatseqatigiiffittut akileraarutinik annertuunik akiligassaqarnissaat naatsorsuutigineqarpoq. Aningaasanut inatsimmi allassimavoq kisitsisit taakku Naalakkersuisut Siulittaasuata Naalakkersuisoqarfiani Siulersuisunut Allattoqarfik suleqatigalugu naatsorsorneqarsimasut.

33 millionit koruuninit naatsorsuutigineqarpoq Royal Greenland 20 millionit koruuninik akiliissasoq.

Taamaattumik nunap karsianut isertitassanik annaasaqarneq 80 millionit koruunit pallillugit annertussuseqarsinnaavoq.

Tapiissuteqarluartoq

Royal Greenland ukiuni arlalinni nunatta karsianut annertuumik tapiissuteqartarsimavoq. 2022-mi naatsorsuutit takutippaat, ingerlatseqatigiiffittut akileraarutitigut iluanaarutitigullu 93 millionit koruuninik ingerlatseqatigiiffik tunniussaqarsimasoq. Ukiup siuliani Royal Greenland aatsaat taama angusarissaartigaluni naatsorsuutinik tunniussivoq, 166,5 millionit koruuninillu tapiissuteqarsimalluni.