Nunavummi nittarsaassinermi Kalaallit Nunaat peqataasoq
Air Greenlandip Nuummit Iqalunnut timmisartuussisarneranut soqutiginninneq annertooq.
Jacob Nitter Sørensenip Air Greenlandimeersup ippassaq Nuanvut Trade Showimi Iqaluit Nuullu akornanni timmisartuussineq eqqartorpaa.
Assiliisoq: Air Greenland
Kalaallit Nunaannit aallartitat suliffeqarfiillu aqqaneq-marluk ulluni makkunani Nunavummi nittarsaassinermi peqataapput.
Nunavummi niuerneq suleqatigiinnerlu sammineqarput.
Baffinip Nunap immikkoortuani Niuernermik Suliniaqatigiiffik Nunavut Trade Show-imik 31-issaanik aaqqissuussisuuvoq. Canadap avannaani ukiumoortumik pisut annersaraat, tassani naalakkersuisut assigiinngitsut, inuit kattuffii, Nunavumi suliffeqarfiit, aningaasaliisartut, aallarnisaasut suliffeqarfiillu kujasissumiittut ataatsimoortinneqartarput.
„Suleqatigiinneq – Nunavummi siunissaq ilusilersorlugu“ 2024-mi Nunavut Trade Showimi qulequtarineqarpoq.
Soqutiginninneq annertooq
Tassani kalaallit suliffeqarfii arlallit peqataapput.
Taakkua tassaapput Royal Arctic Line, Royal Greenland, Sikuki Nuuk Harbour, Qalut Vonin, Air Greenland, Nalik Ventures, Arctic Law, eqqartuussissuserisut Ascanius, Up Front aamma Sulisitsisut.
– Nuup Iqaluillu akornanni timmisartuussisarnitsinnut soqutiginninneq annertuvoq. Maanna amerlanerusut timmisartuussisarnitsinnut atuinerulersinniassavavut, Air Greenlandimi pisortaq Jacob Nitter Sørensen Iqalunni peqataasoq oqarpoq.
– 2022-mi pisussaaffigiligaanngitsumik isumaqatigiissut (Memorandum of Understanding) pillugu suliaqarnerup annertusinissaanut aqqutip tunngaviliisuunissaa qilanaaraara, taannami tunngavigalugu timmisartuussisarnerput aallartipparput, taanna oqarpoq.
Kalaallit Nunaat sinerissap qanittuani aalisarnermit misilittakkaminik tunniussaqarluarsinnaasoq aammalu Royal Arctic Line aamma Royal Greenland suleqatigilluarneqarsinnaasut, Jacob Nitter isumaqarpoq.
– Nunavummi sinerissap qanittuani aalisarnermit siuarsimanerujussuuvugut, taanna oqarpoq.
