Nungusaataanngitsumik puisinniarneq qallunaat tulluussimaarutigisariaqarpaat
Taama isumaqarpoq nunarsuarmi minkit amiinik tunisassiortut annersaat Kopenhagen Fur aqagu piniartut taperserniarlugit akerliussutsimik takutitseqataaniartoq
Piniartut nannunik qarlillit siulittaasorlu alutornartumik puisit amiinik kavaajaaralik.
Aqagu Københavnimi Kogens Nytorvimi Magasin du Nordip saavani taamaatutt inuit takusinnaassavaat. Nunatsinnit tamarmi puisinniartartut KNAPK-mi siulittaasoq Leif Fontaine siuttoralugu qanittukkut Københavniliarput maajip aallaqqaataani tulunnit pigineqartup Magasin du Nordip saani puisit amiinik tuniniaaqqusaajunnaarnera pillugu akerliussutsimik takutitsiniarlutik.
Nunarsuarmi tamarmi minkit amiinik tunisassiortut annersaata Kpenhagen Furip piniartut taperserniarpai. Danmarkimi amernik tuniniaavissuarmi isumaqarput qallunaat nungusaataanngitsumik piniarneq tulluussimaarutigisariaqaraat.
- Kalaallit puisinik piniartarnerat assersuutaannaavoq. Nungusaataanngitsumik piniarneruvoq Danmarkimi tapersersorlugulu tulluussimaarutigisariaqagarput. Qallunaat kalaallillu peqatigiiffeqarput, isumaqarpungalu uagut Danmarkimi sutigut tamatigut issittumi inuit kulturiat tapersersortariaqaripput, Kopenhagen Furimi attaveqarnermut pisortaq Sander Jacobsen Sermitsiaq.AG-mut oqarpoq.
- Danmarkimi niuertarfiit aamma puisit amiinik tuniniaanissaat periarfissatsialaavoq asuli eqqarsaatigilluagaanngitsumik amernillu tunisassianik akerliuniaannarnerminngaaniit. Kalaallit Nunaanni inuiaqatigiit piniartut nunat tamalaat akornanni niuertarfiutilissuarnut Debenhamsitut ittunut soriarsinnaanngilluinnarput ingasattajaarlutik avatangiinik illersuinermut sunniiniapiloortillugit, Sander Jacobsen oqarpoq.
Se også "Video: Se fangerne på Youtube"
Læs også "Meningsmåling dumper sælskind"
Magasin tatineqarpoq
Magasinip niuertarfii siusinnerusukkut qallunaanit pigineqarsimasut 2009-mi Debenhamsimut tulunnit pigineqartumut tunineqarput, maajillu aallaqqaataani uumasut nujuartat suulluunniit amiinik tuniniaaqqusaajunnaarnissamik tatineqarlutillu pinngitsaalineqarput, Kopenhagen Fur isumaqarpoq.
- Taamaaliorneq naapertuunnersoq paasiuminaappoq, Magasin neqinik aappaluttunik, immunnik tunisassianik amernillu ateraasalianik tuniniaatillugu. Uumasut meqqulinnik amillit pineqarnerat uumasunut allanut naleqqiullugu allaanerusariaqanngilaq, Sander Jacobsen oqarpoq.
- Imminut akerleriittumik isummerneruvoq eqqumiitsoq piviusut tunngaviginagit nunarsuarmioqatigiinnulli qujageqqusaarluni iliornerulluni. Uggornarpoq Danmarkimi Magasin taamaattumik politinneqartinniarneqarmat, Sander Jacobsen oqarpoq.
Læs også "Forbud mod sælskindssalg i Magasin"
Læs også "Få danskere kender inuit-undtagelsen"
Allat aamma tapersiiniarput
Nunatta ammerivia Great Greenland kiisalu Danmarkimi kalaallit ilinniagaqartut kattuffiat Avalak aamma akerliussutsimik takutitsinermik tapersersuissaaq, taannalu aqagu qulinut Kongens Nytorvimi aallartissaaq, piniartut kalaallillu Folketingimut ilaasortat marluk IA-miit Sara Olsvig Siumumiillu Doris Jakobsen oqalugiassallutik.