Nuuk Centerimi sanileriit saqitsaannerat eqqartuussivimmi aalajangiiffigineqartoq
Pisiffik A/S-ip Nønne ApS-illu sodavandinik tuniniaaneq pillugu saqitsaassutaanni, Kalaallit Nunaanni Eqqartuussivik aalajangersimavoq, atisaarniarfiup Nønnep imigassanik tuniniaasarneranut inerteqquteqalernissamik Pisiffiup kissaataa itigartissallugu.
Pisiffik A/S inerteqquteqartitsinissamik eqqartuussivimmut maajip tallimaani suliassanngortitsisimavoq, isumaqaramik Nønne ApS, Nuuk Centerimi ulluinnarni inuussutissanik tuniniaanissamut Pisiffiup kisimi akuersissuteqarneranik unioqqutitsisimasoq.
Nønne ApS-imik piginnittup Morten Nordahlip, suliaq siullermik naammassineqarmat tapersersorneqarninni Facebookikut qujassutigaa.
Eqqartuussivik juunip pingajuani aalajangerpoq, Pisiffiup inerteqquteqartitsinissamik piumasaqarnera itigartinniarlugu, peqatigitillugulu suliami aningaasartuutinik 7000 koruuniusunik Pisiffik Nønne ApS-imut akiliuteqassasoq aalajangiilluni.
Pisiffiup aalajangiineq Kalaallit Nunaanni Eqqartuussivimmut juunip qulingiluaani ingerlateqqissimavaa, taassuma suliaq maanna aalajangiiffigisassanngorpaa.
Pisiffik A/S suliamut tunngatillugu Sermitsiaq.AG-mut oqaaseqarusussimanngilaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...