Nuuk Imeq kaaviiaartitanik aatsaat taama amerlatigisunik kaaviiaartitsivoq
Nuuk Imiup ukiuni 35-ngajanni sodavandiliorlunilu immiaaqqanik puiaasaliorluni ingerlatsisimanini 2023-mi naggaserlugu nuannersumik naammassivaa.
2023-mut ukiumoortumik naatsorsuutit – ukiumi kingullermi tunisassiortuuffigisami – kaaviiaartitat ukiup siulianut sanilliullugit 22,8 millionit koruuninik qaffariarsimapput, akileraarutillu suli ilanngaatiginagit ukiumoortumik angusat 56 millionit koruuniullutik.
Immiaaqqanik sodavandinillu piumasaqarneq 6 procentimik 7,5 procentimillu qaffariarpoq, tamannalu ukiumut angusat naatsorsuutigineqartumit 10 millionit koruuningajannik qaffasinnerannut pissutaasut ilagaat. Aammattaaq suliffeqarfimmik matusinissamik aalajangerneq ingerlatsinermut aningaasartuutinik sipaarniutaavoq.
Matusineq aliasuutaasoq
Namminersorlutik Oqartussat poortuutit pillugit nalunaarutaat ukiup nikinneranit atuutilersimasoq pissutigalugu suliffeqarfik matusariaqarsimasoq pillugu aqutsisut nalunaarusiaminni aliasuutiginngitsuunngilaat.
Nuuk Imeq 2023-mi kisitsisit pingaarnerit
Kaaviiaartitat: 236,5 millionit koruunit
Ukiumut angusat: 55 millionit koruunit
Nammineq aningaasaatit: 94,4 millionit koruunit
Ukioq kaajallallugu sulisut: 39
Avatangiisinik illersuiniarluni poortuutit utertinneqarsinnaasut atuutilersinniarlugit suliffeqarfiup pilersinneqarnissaa politikkikkut kissaataasimasoq oqaatigineqarpoq.
- 2023-mi puiaasat agguaanneqartut 98,0 procentii utertinneqarsimapput (2022-mi 98,7 procentit). Taamaalilluni Nuuk Imeq A/S-ip avatangiisinut tunngatillugu anguniakkat, ingerlatseqatigiiffiup pilersinneqarnerani aalajangerneqarsimasut, naammassingaatsiarsimavai, pisortaq Bernhard Christensen siuttoralugu aqutsisut allapput.
Suliffeqarfik inuiaqatigiit aningaasaqarnerannut iluaqutaasumik sunniuteqartoq aammattaaq allassimavoq, makkulu erseqqissarneqarput:
- Erngup nukinganik nukissiorfiit amerlanerit atorlugit tunisassiortoqarsimavoq, tamatumalu kingunerisaanik mingutsitsineq annikinnerulersimavoq.
- Sinersortaatikkut assartukkani tamani nioqqutissat puiaasat utertinneqarsinnaasut affaanik amerlassuseqarput, taamaalillunilu nunaqarfinnut nunaqarfinniillu assartuinermut tunngaviusumik inissisimallutik
- Sulisut akissarsiaasa akileraaruserneqarnerat iluanaarutinillu akileraarutit najukkami aningaasaqarnermik siuarsaaqataapput
- Imigassaq akitsuuteqarpat akitsuuteqanngikkaluarpalluunniit - inuiaqatigiinnut ukiumut 100-250 million koruunit missaannik tunniussaqarpoq
- Nuuk Imeq A/S-ip ajuusaarutigaa tamanna Namminersorlutik Oqartussat sodavandinik immiaaqqanillu tuniniaanermut eqqussuinermullu sinaakkutissanik allannguiniarlutik aalajangerneranni pingaartinneqanngimmat, aqutsisut allapput.
Suliat kingulliit
Poortukkat utertinneqartartut suliarinissaat, aserorternissaat tuniniaaffigisartakkanillu peernissaat ukioq manna suliffeqarfiup suliassarai. Tamatuma saniatigut tunisassiorfik illut tuniniarneqalersinnaaniassammata tunisassiorfik isaterneqalereerpoq.
2024-mi 17 millionit koruuningajannik sinneqartoornissaq naatsorsuutigineqarpoq, illut tunineqarnerat tunngavigalugu, sulisunut iluarsaannermullu aningaasartuutit ilanngaatigereerlugit.
Ukiup ingerlanerani tamakku tamarmik naammassineqarpata piginneqataasunut pingasunut, tassa Kommuneqarfik Sermersuumut (36,28 pct.), Carlsberg Breweries A/S-imut aamma Royal Unibrew A/S-imut, tamarmik immikkut 31,86 pct.-imik piginneqataasunut, ingerlatseqatigiiffimmi aningaasat sinneqartoorutit agguaanneqarsinnaapput. Ukiup naanerani nammineq aningaasaatit 94,4 millionit koruuniupput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...