Nuuk Imeq: Sulisut toqqissisimanngillat
Nuuk Imermi pisortaanerup Bernhard Christensenip maqiteriviup siunissaa ernumagilluinnarpaa. Utertitsisarneq pillugu nalunaarutip isumaqatigiinngissutaaqisup suliarineqarnera amigaateqartoq oqaatigaa - kinguneqaataasinnaasunillu nalilersuissoqarnissaa ujartorlugu.
Nuuk Imiup kisermaassisuunerata piffissami qaninnerusumi atorunnaarnissaa paasinarsivoq. Kalistat Lundip (IA) oqaatiginikuuaa, ukiup naannginnerani allatut periuseqalernissamut alloriaqqaartoqassasoq.
Sermitsiaq.AG-mit utertitsisarnermik aaqqissuusseqqittoqassappat, maqiterivimmi aqutsisut tamatuma maqiterivimmut qanoq kinguneqaataasinnaaneranik takorluusimanersut paasiniarlugu Nuuk Imermi pisortaaneq Bernhard Christensen oqaloqatigineqarsimavoq.
Pisortaanerup ilisimatitsissutigaa, siulersuisut ippassaq ataatsimiissimasut. Siulersuisuni isumaqatigiissutigineqarsimavoq, novembarip 22-ani suliap aappassaaneerlugu suliarineqannginnerani Nuuk Imermit avammut oqaaseqartoqarusunngitsoq.
- Aappassaaneerlugu suliarineqarnissaa ataatsimiititaliamilu suliarineqarnissaa isumalluarfigineqarpoq. Takujumaarparput ajungitsumik inerneqassanersoq, Bernhard Christensen oqarpoq.
- Niuerfik annertusinavianngitsoq
Maqiteriviup pisortaanerata oqaatigaa, siullermeerinnilluni suliarinninneq Nuuk Imiup siunissaanut ernumanartoqartitsisoq:
- Kisermaassinerup atorunnaarsinneqarnissaa amerlanerussuteqarfigineqarnissaatut nipeqarpoq.
Bernhard Christensenip oqaatigaa, siullermeerlugu suliarineqarnerani ilisimasalinnit ilanngussaasinnaasorpassuit amigaatiginartut, pingaartumik Nuup Imiup Kommuneqarfik Sermersuumi suliffissaqartitsinera eqqarsaatigalugu.
- Isertuutinngisaannarparput, Nuuk Imiup ingerlanneqarnerata saniatigut nioqqutissanik eqqussuisarnerput Nuup Imiup siunissami akilersinnaasumik ingerlaannarsinnaaneranut qulartitsisartoq. Maqiterivik 1989-imi immiaaqqanik 40 millionit angullugit amerlassusilinnik sodavandinillu 10 millionit angullugit amerlassusilinnik maqiterisarsimavoq, Kalaallit Nunaanni ullumikkut taamatut imertigiunnaarsimavugut.
Bernhard Christensenip oqaatigerusutaa tassaavoq, Nuuk Imermi ullumikkut maqinneqartartut amerlassusaat sunniuteqartartut - maqinneqartartut ikinneruleriartorlugit, tunisassiat ataasiakkaat akisuneruleriartortartut.
- Niuerfimmi annertusinavianngilaq. Naatsorsuutigaarput kalaallit ullumimut sanilliullugu siunissami immiaaqqanik sodavandinillu suli imernikinnerulissasut. Avitseqatigiissagaannilu tamarmik annikinnerusunik pisassallutik. Sulisuvut toqqissisimanngillat - tamannalu nuannerpallaanngilaq.