Nuummi Mittarfimmi qitiusumik akuersissut unitsinneqarpoq - nunanut allanut angalasussat mittarfinnut allanut ingerlateqqinneqartassapput
Angallannermut aqutsisoqarfiup (trafikstyrelsip) Nuummi Mittarfimmi nunanut allanut angalasunut isumannaallisaanermik nakkutilliineq unitsippaa.
Assiliisoq: Morten Okkels
Sapaat akunnerani matumani pingasunngornerup unnuaaniit Angallannermut Aqutsisoqarfiup Nuummi Mittarfimmiit nunanut allanut angalasunut isumannaallisaanermik misissuisarneq unitsikkallarpaa.
Greenland Airports Facebookimini taamak nalunaarpoq.
Unitsitsinerup kingunerisaanik imatut paasineqartariaqarpasippoq Kalaallit Nunaanniit angalasussat Kangerlussuarmi imaluunniit Narsarsuarmi isumannaallisaanermik misissortittassapput.
Greenland Airportsimit unitsitsinermut tunngatillugu maannamut avammut imatut nalunaaruteqarpoq:
- Aqqutissat ilaanni siunissami qaninnermi Kalaallit Nunaanniit angalaniartut Kangerlussuarmi imaluunniit Narsarsuarmi isumannaallisaanermik misissortittassapput.
Sermitsiamiit sulissutigaarput Greenland Airportsimit nassuaasitsinissarput unitsitsigallarneq qanoq kinguneqarpiassanersoq.
Piumasaqaatinik naammassinninngitsoq
Greenland Airports naapertorlugu unitsitsineq pissuteqarpoq, Angallannermut Aqutsisoqarfiup oqarneratut nunanut allanut angalasunut isumannaallisaanermik misissuisartutut sulisut pikkorissartarnerisa atuuttut piumasaqaatit naammassisimanngimmagit.
Nunatta iluani timmisartuussinermut mittarfiup isumannaallisaanermut uppernarsaataa suli atuuppoq.
- Angallannermut Aqutsisoqarfimmik qanimut suleqateqarluta pikkorissartarnerit pineqartut naammassiniarlugit sulissutigaarput. Siunertaraarput nunanut allanut angalanermi nalinginnaasumik ingerlatsinermik piaarnerpaamik uteqqissasoq, Greenland Airports allappoq nangillunilu:
- Kalaallit Nunaanniit angalasussat qanittukkut aalajangersimasunik aqqutinik Kangerlussuarmi imaluunniit Narsarsuarmi isumannaallisaanermik misissortinneqarsinnaassapput.
Greenland Airportsip aamma qanimut attaveqarfigivai Air Greenland aamma timmisartortitseqatigiiffiit allat pisut pillugit.
Angalasut eqqugaasut timmisartortitseqatigiiffimminnit attavigineqassapput.
Greenland Airports-imit nalunaarutigineqarpoq, mittarfiup isumannaallisaanermut tunngatillugu ajornartorsiutit arlaleriaqalutik mittarfiup ammarneranut kinguartitsisarsimammata, taamaalillunilu timmisartut kinguaaattoortarlutik.
