- Suliffeqarfiup ineriartortinnissaanut periarfissaqartoq takusinnaavarput - minnerunngitsumik nunatsinni illoqarfinni allani. Nuummi avataani aamma illoqarfeqarpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
- Suliffeqarfiup ineriartortinnissaanut periarfissaqartoq takusinnaavarput - minnerunngitsumik nunatsinni illoqarfinni allani. Nuummi avataani aamma illoqarfeqarpoq.
Niclas Niclasen, Nuuk Transportimi pisortaaneq oqarpoq. Taassuma Edward Niclasen peqatigalugu Usisaat Flytteservicemik aamma Usisaat Spedition Air & Oceanimik suliffeqarfimmit ajornartorsiortumik, ukiuni naatsorsuuseriffinni marlunni kingullerni nammineq aningaasaatiminik annaasaqareernermi kingorna atorunnaarsikkiartorneqartumik pisinissamik isumaqatigiissummik atsiorput.
Usisaat Flytteservicemik aamma Usisaat Spedition Air & Oceanimik pisinissamik isumaqatigiissut suli naammassinngilaq, taannami Atuisunut Unammilleqatigiinnermullu Aqutsisoqarfimmit akuerineqartussaavoq.
– Atuisunut Unammilleqatigiinnermullu Aqutsisoqarfiup akuersinissamut ullut suliffiusut 30-t atortussaavai. Tassa sapaatit akunnerisa arfinillit ingerlaneranni aalajangiisoqassasoq ilimagisinnaavarput, Niclas Niclasen oqarpoq.
Niuerfik nutaaq
Pequtinik nussuineq Niclasenikkunnut niuerfiuvoq nutaaq, taakku ukiut ingerlaneranni suliffeqarfissuarmik ineriartortitsipput, tassanilu ilaatigut biililerivik, iluarsaassineq, oqimaatsunik assartuineq, kraninik suliassat, cafeteriaqarneq, aalisariutinik usingiaaneq anartarfinnillu imaarsaanerit suliarivaat.
Niclas Niclasenip paasissutissat isertuuppai:
– Suliffeqarfiup aqutarinngisama siunnerfilerniarnissaa ajornakusuulaarpoq. Pisineq akuerineqassappat, soorunami allannguisoqassaaq, tamannali sulisut, suleqatit sullitallu ataqqillugit isumasioqatigalugillu pissaaq.
– Soorunami sorusunnerput nalullugu pisinissamik neqerooruteqarsinnaanngilagut. Matumani nuna tamakkerlugu suliffeqarfimmik ingerlataqarsinnaanermut periarfissaqarnissaq pineqarpoq.
Sinerissami immikkoortortaqarfiit
– Nuup avataani aamma illoqarfeqarpoq – suliffeqarfillu ineriartortikkusupparput.
Matumanilu Usisaat Flytteservicep Ilulissani, Aasianni, Narsami Qaqortumilu immikkoortortaqarfeqarnissaa, nunallu sinnerani suleqateqarnissaq periarfissatsialaavoq.
– Pisineq iluatsissappat aallaqqaammut tamanna Usisaammi sulisunut annertuumik allannguiffiussanngilaq. Suliffeqarfiup Nuuk Transportip Saffiorfiullu saniatigut immikkoortutut namminersortutut ingerlannissaa siunertaraarput. Suliffeqarfiillu marluk akornanni pitsaasumik sunneqatigiinnissamut periarfissat soorunami qissimigaassavagut.
– Qeqertani toqqorsiviup piginnarnissaa aamma pilersaarutaavoq. Illorsuaq niuernermut ilaanngilaq, illorsuulli attartornissaanut isumaqatigiissut ilaavoq. Taanna toqqorsivittut aaqqiinissamut nutarsaavoq, taannami nutsernernut atatillugu containerinik kiassakkatut toqqorsivittut atussallugu piukkunnaatilerujussuuvoq, taamaammallu nutsernernik suliffeqarfiup ilagalugu pingaarutilik.
– Maannali Atuisunut Unammilleqatigiinnermullu Aqutsisoqarfiup aalajangernissaa utaqqivarput – taava susoqaqqissanersoq paasinarsissaaq, Niclas Niclasen oqarpoq.
