Nuummut minnissamut malittarisassat immikkut ittut

Angallannermut Aqutsisoqarfik Nuummi mittarfiup atulernissaanut novembarip naanerani akuersissuteqarmat, immikkut ittumik tapiliussaqartoqarpoq, Air Greenland aamma Icelandair kisimik mittarfimmut mittarfimmillu nunanut allanut timmisartuussisinnaatitaassasut.

- Tapiliussaq tamanna immikkorluinnaq ittuuvoq, nunat tamalaat akornanni timmisartuussinermi maleruagassat nalinginnaasut nunat akornanni — timmisartortitseqatigiiffiit akornanniunngitsoq — isumaqateqatigiinnermik annertuumik qulakkeerinnittarmata, timmisartunik isumannaallisaanermik immikkut ilisimasalik Paul Hulme Harrison, ingeniørit kattuffiannit IDA-meersoq, taama nassuiaavoq.

- Timmisartornermut tunngasut malittarisassarpassuaqarput. Isumaqatigiissuterpassuaqarpoq maleruarneqartartussanik – taamaattuaannarporlu. Imaakkajuttarpormi timmisartuutileqatigiiffik nunamit allameersoq missinnaatitaagaangat, tamanna aamma nunamut aggerfianut atuuttarluni.

Nunarput immikkorluinnaq ittuusoq

Kalaallit Nunaanni timmisartorneq assigiinngitsorpassuartigut immikkorluinnaq ittuusoq, Harrison nassuiaavoq, silap pissusia nunallu isikkua immikkut ittoq pissutigalugit – tassa nunap qaavata ilaa.

- Assersuutigalugu aamma kikkut Narsarsuarmut missinnaanerat killilersorneqarpoq. Tamatumunngali atatillugu timmisartortitseqatigiiffiit killilersorneqanngillat, timmisartortartulli killilersorneqarlutik, taakku Kujataani mittarfimmut missinnaajumallutik immikkut sungiusartinneqartariaqartarput.

- Aammattaaq Narsarsuarmut minniaraanni nuissat qutsissusiat isikkivillu pillugit malittarisassat immikkut ittut malinneqartariaqarput. Mittarfik immikkuullarissupilussuuvoq qaqqap tunuaniikkami, taamaattumillu missanerluni minnissarluunniit taamaatiinnarniarnerlugu aalajangernissamut piffissaq sivikitsuararsuuvoq, Paul Hulme Harrison oqaluttuarpoq.

Angallannermut Aqutsisoqarfik aamma isumaqarpoq mittarfinni taakkunani marlunni pissutsit sanilliunneqarsinnaanngitsut.

- Nuummi atugassarititaasuni mittarfiup nunanit tamalaanit timmisartuussinernut akuersissummik tunineqarnissaanut piumasaqaateqarfigaarput. Tamatumunnga pissutaavoq mittarfiup suli tamakkiisumik inissinneqannginnera, suliniutit nutaat periaatsillu nutaat, nunanit tamalaanit timmisartuussinernut piumasaqaatini tunngaviusut. Nuummi mittarfik annerujussuuvoq assigiinngiiaarnerulluni, assersuutigalugulu Narsarsuarmut sanilliullugu angallaffiunerujussuulluni, Angallannermut Aqutsisoqarfik Sermitsiamut taama ilisimatitsivoq.

Isumannaallisaanikkut ajornartorsiuteqanngitsoq

- Taamaattumik piumasaraarput mittarfik immikkut ittumik iliuuseqassasoq killilersuillunilu, inaarutaasumik aaqqiissutissat utaqqineranni isumannaallisaanerup atuutiinnarnissaa qulakkeerniarlugu. Taamaalilluni isumannaallisaaneq suli isumannanngilaq, tassa aaqqiissutissat kingulliit utaqqinerini.

- Pisumi matumani pineqarpoq, nunat tamalaat akornanni timmisartuussinerit taamaallaat Air Greenlandimut Icelandairimullu killilerneqarallarnissaat, taakkumi timmisartortartui Kalaallit Nunaanni pissutsini immikkut ittuni timmisartuussinissamut sungiusarsimammata – Nuummilu mittarfinni sulisut timmisartuutileqatigiiffiit taakku marluk timmisartuinik ingerlatsinissamut sungiusarsimammata.

Paul Hulme Harrison Angallannermut Aqutsisoqarfiup akissutaa pillugu ima oqarpoq:

- Angallannermut Aqutsisoqarfik pingaarutilimmik aalajangiussaqarpoq. Timmisartukkut angallannermut aaqqissuussinermik pilersitsineq sivisusinnaavoq – mittarfeqarfillu mittarfiinnaanngilaq.

- Sorpassuit inissinneqaqqaartariaqarput. Mittarfiup illutai aaqqissuussaanerlu. Assersuutigalugu timmisartunut unittarfiit timmisartunut mittussanut naleqqussartariaqarput, timmisartunut mittussanut soorlu majuartarfiit nassatanillu assartuutinut naleqqussarlugit. Tassa miffissap qanoq takitiginera timmisartullu qanoq ittut mittussaanerat kisimik eqqarsaatigineqanngillat, aammali timmisartut qanoq ittut mittussat eqqarsaatigineqartariaqarput.

- Tamakkua saniatigut allarpassuit aamma apeqqutaapput, assersuutigalugu timmisartoq mittarfimmi uninngavissaminut nammineq unikkiartorsinnaanersoq imaluunniit truckinik kalillugu inissikkiartorneqassanersoq.

Taamaattumik Nuummi killilersuinerit eqqarsaatigalugit isumaqarpunga tamanna maannakkut silatusaarnerusoq. Aamma naatsorsuutigaara Angallannermut Aqutsisoqarfiup ineriartorneq malinnaaffigiuassagaa. Nuummimi mittarfittaaq Kalaallit Nunaata ineriartornissaanut periarfissaqarluarpoq – tamannalu atorluarneqarpat soorunami timmisartortitseqatigiiffiit amerlanerpaat Kalaallit Nunaata illoqarfiisa pingaarnersaannut missinnaasariaqarput, timmisartunik isumannaallisaanermik immikkut ilisimasalik oqarpoq.

Timmisartunik isumannaallisaanermut immikkut ilisimasalik

Paul Hulme Harrison inuunermi ilarujussuani timmisartunik nakkutilliisuuvoq. Ilaatigut Naalagaaffiup Timmisartortitseqatigiiffiani atorunnaartumi aamma timmisartornermi atortunik isumaginnittoqarfimmi atorfeqarsimalluni, ilaatigut radarinik pisinissanik aqutsinermillu isumaginnittuusimalluni. Taanna aamma nammineerluni timmisartumik aqussinnaavoq, namminermi timmisartuminut akuersissutaateqarami. Paul ingeniøritut ilinniarsimanermi saniatigut Certified Lead Auditor-itut ilinniarsimavoq ukiunilu arlalinni

Flyvematerielkommandomilu atorfeqarsimavoq, tassanilu radarinik pisisarlunilu ingerlatsisarpoq. Aamma nammineq timmisartumik aquttarpoq, namminermi timmisartuussinissamut allagartaqarpoq. Paul ingeniøritut ilinniagaqarnerup saniatigut Nakkutilliisut Aqutsisuattut ilinniarsimavoq, Københavnillu mittarfiani ukiorpassuarni Nakkutilliisutut atorfeqarsimalluni.

Paul ullutsinni namminersortutut siunnersuisarfiuteqarpoq ilaatigullu timmisartuutillit timmisartortartullu kattuffianni AOPA-mi siulersuisuniilluni kiisalu IDA-Flymi timmisartornermik suliaqartut attaveqaqatigiiffianni siulersuisuniilluni.