– Nuup avataani najugaqarnissaq pilerinarunnaarpoq

Tage Lennertip Sulisitsisut Peqatigiiffiata ataatsimiinneranut aallartitatut peqataajartorluni Sisimiunit Nuummut angalatilluni Kangerlussuarmi mittarfik sapaatip-akunnerata naanerani kingullermi seeqqummerluni kunippaa.

Ataatsimiittarfimmi, aallartitat ataatsimiinneranni, Tage Lennert Naalakkersuisut siulittaasuannut Jens-Frederik Nielsenimut (D) Nuummi mittarfittaaq pillugu isornartorsiuisumik apeqquteqarnissaminut periarfissaqalerpoq:

- Nuummi mittarfittaap ammarneqarnera iluatsilluarpa? Innuttaasut eqaannerusumik atugassaqartitsinissamik bilitsillu akikinnerulernissaannik neriorsorneqarsimapput, Nuummili mittarfik ammarneqarmalli Tuukkaq 32-riarluni utiinnarsimavoq taamaatiinnarluniluunniit. Nunatsinni timmisartuussinermi bilitsit marloriaammik akisunerulerput. Siornatigut Nuummut siumuinnaq bilitsi 900-1.200 koruunit akornanni akeqartarsimagaluarpoq, maannali marloriaammik akisunerulluni. Aamma nioqqutissat tikisinnissaat ajornakusoornerulersimavoq, allakkallu apuunneqarnissaat ajornakusoornerulersimalluni. Ilaannikkut allakkat qaammat ataaseq apuunniarsarisarput, aamma tusarparput pisiniarfiit naatitanik nutaanik timmisartukkut nassiussisarunnaarsimasut. Angallassinermut pilersaarutip allanngortinneqarnera aningaasaqarnikkut annertuumik kinguneqarpoq. Inuiaqatigiittut taama ingerlaannarnissatsinnut akissaqarpugut? Ajornartorsiut qanoq aaqqinniarpiuk? Taama Tage Lennert Jens-Frederik Nielsenimut, apeqqutinut akissuteqariartorluni Sulisitsisut ataatsimiinneranni peqataasumut, aperivoq.

Ajornartorsiutit ilisarisinnaagai

Nuummi mittarfittaamut timmisartuussinerit aalajangersimasumik ingerlasarnerat ajornartorsiuteqartoq, angallannerullu aaqqissuussaaneranut nutaamut nuunnissaq ajornakusoorsinnaasoq Naalakkersuisut siulittaasuata ingerlaannaq nassuerutigaa.

- Timmisartuussinerit aalajangersimasumik ingerlasarnissaat annertuumik ajornartorsiutaasoq erseqqippoq. 2025-miikkaluarluta mittarfiup quasassimanera ajornartorsiutaavoq, angallannermilu aaqqissuusseqqittoqarnissaa aamma ajornakusoortitsivoq. Oqitsuinnaasimanngilaq. Aamma sinerissami timmisartuussinerit aalajangersimasumik ingerlasarnerat annikitsuararsuuvoq, qularinngilarali Nuummi mittarfittaaq nunatsinnut aningaasarsiutaalluassasoq. Timmisartuussinerit amerlanerpaartaat Tuukkaq Nuummut missimatillugu ornigassaminnut apuuttarput, Jens-Frederik Nielsen oqarpoq, angallannermulli ajornartorsiutit qanoq aaqqinneqarsinnaanersut misissorumallugit oqaatigaa.

Maannakkut tamatuma iluatsinngilluinnarneranik, assartuinerullu misissoqqissaartariaqarneranik Tagep oqarnera isumaqatigaara.

Angallannerulerneq Jens-Frederik Nielsenip angallannikkut pitsaanerusumik atugaqarusuppoq, Nuummilu mittarfittaamut aningaasaliineq isumassarsiatsialaasoq qularutiginngilaa.

- Angallannermut tunngatillugu avannaani aamma qulimiguuliuteqarpugut. Uanga nammineq ulluni pingasuni Uummannamiittussaagaluarpunga. Qulimiguulik ilaaffissara arfineq-pingasoriarluni taamaatiinnarneqarsimavoq, angerlamullu timmisartuinnartariaqarsimavunga. Ajoraluartumik Upernavimmi aamma taamatut ajornartorsiuteqarpugut. Innuttaasut ineriartorsinnaanissarpullu pillugit qanoq angallannermik pitsaanerulersitsisinnaanerput misissortariaqaripput pingaaruteqarpoq. Mittarfik isumassarsiatsialaasoq qularinngilara, inerititaali nuannaarutigiumallugit suliaq naammassisariaqarparput.

Isertitassaraluatik annaagaat

Namminersorluni inuussutissarsiortoq alla Sisimiuneersoq Tage Lennertip apeqqutaanut Jens-Frederik Nielsenillu akissutaanut tusarnaarpoq, akissutaali naammaginanngitsoq isumaqarpoq. Michaela Eliassenip ilaquttani tikeraarniarlugit sulinerminulluunniit atatillugu angalaniarluni Sisimiunit Nuummut, Ilulissanut Danmarkimullu angalaneq akisunerulersoq nammineq misigaa.

- Nuup avataani najugaqarnissaq maannakkut pilerinanngilaq. Siornatigut Sisimiuni najugaqarneq, Danmarkimut utimullu timmisartornissaq akikinnerugaluarpoq, kisianni mittarfinni akitsuutit bilitsillu akii qaffassimammata Nuummut Danmarkimullu ilaquttannut tikeraarniarlunga angalaniaruma timmisartornissaq akisunerulersimavoq, Michaela Eliassen oqarpoq, taassumalu Nuummi mittarfik ammarneqarmalli Air Greenlandip timmisartuutaasa bilitsiisa akii marloriaammik qaffassimasut misigaa.

Tamannattaaq inuussutissarsiutaanut nioqqutissanullu tikisipallassinnaaajunnaagaanut sunniuteqarpoq:

- Nioqqutikka Sisimiunut apuussinnaanngisaannarpakka. Siornatigut nioqqutissat nunanit allanit inniminneraangakkit timmisartukkut nassiunneqarpata ullut pingasut utaqqisarnikuuvunga. Maanna ullut 14-it qaammalluunniit ataaseq utaqqisariaqartarpunga. Iluatsinnissaanut suna qularunnaassutigiviuk. Maannakkut inuuinnarumallunga Sisimiunit Nuummut nuussanersunga apeqqutaalerpoq, Michaela Eliassen oqarpoq. 

Tage Lennertip kingoraartissat siornatigornit pissarsiariuminaannerulersimasut aamma maluginiarpaa.

- Ajutoortoqartillugu kingoraartissat tikisinneqassappata timmisartoq Dash 8 assartuinissamut inissaqarpallaanngilaq. Taava Green-Pack-imik, , tassa timmisartukkut assartuinermi akisunerpaamik, siornatigut pisariaqartinneqarsimanngitsumik, maannali atorneqartartumik nassiussisoqartariaqarpoq, Tage Lennert oqarpoq.

Niuernerup iluatsilluarnissaa qularinngilluinnaraa

Nuummi mittarfissamut aningaasaliissutit annertuumik periarfissaqarfiusut, sinerissamili inuusut pitsaanerusumik atugaqarnissaat anguniarlugu angallannerup aaqqissuussaanerata sinaakkusiisalu misissorneqarnissaat pisariaqartoq Naalakkersuisut siulittaasuata oqaatigaa.

- Maanna periarfissaqarluartoq isumaqarpunga. Kisianni aningaasaliissutit tamakkiisumik atorneqarsimanngillat, aamma aalajangersimasumik angallassineq maannakkorpiaq pitsaanngilaq, aamma angallannerup aaqqissugaanerata ataatsimut isigalugu misissortariaqarnera pillugu isumaqatigaakkit. Ingerlatseqatigiiffigut tapiiffigisinnaanngilakka, kisianni pitsaanerulernissaannut sinaakkutissat pilersinniarsinnaavakka, aamma Nuup avataani. Anguniagaq pingaarnerpaaq tassaavoq inuiaqatigiinni angallannerulernissarput, nunamilu A-mit B-mut apuunnissaq ajornannginnerussaaq, taamaalillutami ineriartortitsisarpugut, Jens-Frederik Nielsen oqarpoq nangillunilu:

- Ajornartorsiuterujussuaqarnera nassuerutigilluinnarpara, sumiiffinnilu amerlasuuni akit qaffassimasut nassuerutigaara, Air Greenlandili aamma allanngortitsinissamik aaqqissuussinerlu nutaarluinnarmik unammilligassaqarpoq, aqqummimi tassani pilerinartupilussuarmi unammillerterpassuaqalissaaq. Aamma kiffartuussinissamut isumaqatigiissutit pisariaqartikkatsigit nunap iluani aaqqissuussineq nutaaq misissortariaqarparput, kisianni oqaatsitit ilisarisinnaalluinnarpakka. Tamatuma saniatigut mittarfik ineriartornermut ingerlatitseqqittussaasoq suli qularutiginngilara, tamannalu nunamut tamarmut iluaqutaassaaq.

Uterneq akisusoq

Missinnaannginnermi Københavni taarsiullugu mittarfiginagu Kangerlussuaq taarsiullugu mittarfinngortinneqassasoq Tage Lennert aamma Michaela Eliassen kajumissaaripput.

- Tuukkap Nuummi missinnaanngikkaangami Københavnimut utertittarnera timmisartuutileqatigiiffimmut akisuallaartoq Air Greenlandip nassuerutigaa. Tamanna aningaasartuuteqarfigingaatsiartarpaat. Ilulissani mittarfik nutaaq atulerpat timmisartoq aamma uterumaartoq siulittuisinnaalereerpugut, Tage Lennert oqarpoq.

Aamma takornariat tikissinnaanngippata, taamaalillutillu akunnittarfimmi unnuinissatik misigisassarsiornissatillu, tammajuitsussarsinissatik allarpassuillu inniminneriikkatik taamaatinnarpatigit takornariartitsisartut sinerissamiittut isertitatik annaasinnaavaat.

- Takornariat Tuukkami ilaaqatigut, angalanerminni ullunik annaasaqarlutik akunnittarfinni unnuinissatik, biilinik attartornissatik allanillu pilersaarutigisimasaminnik annaasaqarnertik ajuallaatigaat, tamatumunnga atatillugu Air Greenlandip taarsiullugu mittarfik Københavnimiitinnagu Kangerlussuarmut nuuttariaqaraluarpaa, tassaniillu angalasut ornitassaminnut ingerlatissinnaagaluarlugit, Michaela Eliassen oqarpoq.