Nuup mittarfia ullup sinnera matoqqassaaq

Nuummi mittarfiup iluarsaanneqarneranut ullup sinnerani timmisartuussisoqarsinnaanngitsoq Greenland Airports aalajangerpoq.

Air Greenland
Pingasunngornermi Air Greenlandip timmisartuisa Nuummi mittarfiit atorsinnaanngilaat.

Mittarfimmi itersap iluarsaanneqarnerata sivisuallaarnera pissutigalugu, pingasunngornerup sinnerani mittarfik matoqqassaaq.

Aalajangerneq tamanna peqqussutit malillugit iluarsaassinerup qulakkeerneqarluinnarnissaanik siunertaqartoq, attaveqaqatigiinnermut pisortaq Mikkel Bjarnø Lund Sermitsiamut oqarpoq:

- Qularutigisat tamaasa peerniarlugit timmisartumilu isumannaatsuuneq qulakkeerniarlugu iluarsaasseqqissaarpugut, Mikkel Bjarnø Lund oqarpoq.

Unnugu unnuarulu iluarsaassisoqarsinnaassasoq pingasunngornermi ualikkut naatsorsuutigineqarpoq, taamaalilluni sisamanngorpat ullaakkut mittarfik ammaqqissinnaassalluni.

Misissorluarneqassasoq

Ajornartorsiut „nunap naqqata inississimaneranit“ pissuteqarunartoq attaveqaqatigiinnermut pisortaq allakkatigut akissuteqarluni oqarpoq:

- Aqquserngit mittarfiillu sanaartorneqarneranni nunap naqqata nikittarnera inissittarneralu nalinginnaalluinnartarpoq.

- Arlalinnik pissuteqarsinnaasarpoq, matumanilu qanoq pisoqarsimanera oqaatigiuminaassinnaavoq, maannali tamanna misissornerussavarput.

Kinguaattoornerit taamaatitsiinnarnerillu pillugit nittartakkami malinnaaqqullugit Air Greenlandip pingasunngornermi siusinnerusukkut ilaasut kajumissaarpai. Angalanissamut pilersaarut nutaaq nal. 21.00 sioqqullugu ilaasut eqqugaasut tamarmik pissagaat paasissutissani kingullerni ilaatigut Air Greenland allappoq.

Powered by Labrador CMS