Nuussuarmi oliemik misissuinissaq navianartoq
Oliesiornermi aatsitassanillu misissuinermi uumassusillit pinngortitarlu innarlerneqarsinnaasut nalunaarusiap nutaap takutippaa.
Tuttut, kalaallit nunaata nerleri, timmiaqatigiit arlallit, eqaluit naasullu qaqutigoortut kalaallit nunaata kitaani Nuussuarmi uumassusillit pingaarutillit ilagaat. Tamakku tamaani oliemik aatsitassanillu misissuinermit sunnerneqarsinnaasut Danmarkimi Avatangiisit pillugit Nakkutilliisoqarfiup, Aatsitassanut Pisortaqarfimmut nalunaarusiortuusup, avatangiisit pillugit periusissamik misissuisitsinerata kingulliup nalunaarusiaani takuneqarsinnaavoq.
DMU-p nalunaarutaata eqikkaalluni aalajangersarpaa, Nuussuarmi aatsitassarsiornerup avatangiisillu akornanni "aporaassinnaanerannut navianaat" annertuujusoq, tamaani nunat pukkitsortaasut killeqarnerat pissutigalugu.
Tassami uumasut naasullu ataatsimoortut annermik tamaaniittuupput. Aamma nunani taamaattuni aatsitassanik misissuinissamik sulinissat ajornannginnerpaasussaapput, taamalu nunani qatsissuni suliniaraanni pukitsortaat sinerissap tungaanut aqqutissatut atorneqartussaapput.
DMU-lli aamma erseqqissarpaa naasunut uumassuseqarnermullu ilisimasat maanna pigineqartut pingaarutilinnik amigaateqarmata. Suliassanik ataasiakkaanik avatangiisitigut nalilersuineqavitsinnagu amigaatigineqartut tamakku aaqqiivigineqaqqaartariaqarput.