Olivinimik piiavik matuneqaqqajaavoq
Suliffiit 28-t navianartorsiussapput, Maniitsup eqqaani olivinimik piiavik aningaasarliorneq peqqutigalugu matuneqassappat.
Aatsitassarsiorfiup Minelco A/S-ip, Maniitsup eqqaani olivinimik piiassup siunissani nalilersorpaa, aatsitassarsiornerup ingerlannerani aningaasatigut angusat ilimagisamiit ajornerunerat peqqutigalugu, aatsitassanut pisortaqarfik nalunaarpoq.
Ilaatigut olivinip Europamut assartornerani aningaasartuutit qaffasinnerujussuat ingerlatsinermut oqimaatsorsiortitsivoq.
Seqimi olivinimik piiaavik 2005-imili ingerlanneqarpoq, ukiunilu 2005-imiit 2009-mut olivin 1.700.000 tonsit missaat tunisassiarineqarsimalluni. Aatsitassarsiorfimmi 28-t missaat sulisorineqarput.
Aatsitassanut pisortaqarfik Minelco A/S-ilu maannakkut siunissaq pillugu qanittumik oqaloqatigiipput. Misissorneqarpoq aatsitassarsiorfik matugallassappat tunisassiornerup aallarteqqinnissaanut tunngavissaqarnersoq, soorlu Kujataani kuultisiorfimmi Nalunami pisoqartoq.
– Amerikap tuniniaaviani suli misilinneqanngitsunik periarfissaqarpoq, ullumikkulli niuerfik nunarsuarmilu aningaasarliorneq taamaatillugit iluatsitsinissaq ajornakusuussaaq, aatsitassanut pisortaqarfimmi pisortaq Jørn Skov Nielsen oqarpoq.
2005-imi aatsitassarsiorfik pilersinneqarmat matunissamut pilersaarummik suliaqartoqarpoq, tassani qulakkeerneqarluni aatsitassarsiornermut atortut allallut piiarneqarnissaat nunalu ileqqumisut ilineqarluni. Matunissamut pilersaarutip piviusunngortinnissaanut aningaasatigut qulakkeerisoqarsimavoq.