Olsvig: Suliniutinut angisuunut oqallinneq sangutinneqartoq
Qallunaat tusagassiiviisigut suliniutinut angisuunut inatsisip sammineqarnerani paatsuukkat amerlaqaaq. Taamaattumik Danmarkimi oqallinneq pissusissarinngisaminut sanguvoq, IA, MF, Sara Olsvig oqarpoq
- Maannakkut Danmarkimi suliniutit angisuut pillugit oqallinneq pissusissarinngisamut sangutinneqarpoq. Tamanna paatsuukkanik amerlasuunik tunngaveqarlu saqqummiussinermit aallaaveqarpoq.
Taamak Sara Olsvig oqarpoq, Inuit Ataqatigiit sinnerlugit folketingimut ilaasortaq oqarpoq.
- Inatsisikkut kalaallit sulisinnaasut aamma sulinermik inuussutissarsiuteqartut kattuffii nunanit allaneersunik isumaqatigiissusiorsinnaanerat mattunneqanngillat, imaluunniit sulisartut tamakku pillugit qanoq iliuuseqarsinnaanerat mattunneqanngillat, Sara Olsvig tunngavilersuivoq.
- Tamatuma saniatigut inatsimmi ersippoq suliffissaqartitsinermi illuatungeriit Kalaallit Nunaanni akissarsiat minnerpaaffissaattut isumaqatigiissutaat nunanit allanit suliartortunit aamma atorneqarsinnaasut. Aamma aningaasarsianit taakkunannga qanoq amerlatigisunik ilanngaasoqarsinnaanera killilerneqareerpoq, assersuutigalugu nerisaqarnermut ineqarnermullu. Kalaallit Nunaanni nerisaqarnermut ineqarnermullu akiliisitsisarneq takornartaanngilaq, Olsvig tusagassiivinnut nalunaarpoq ilaatigut eqqaallugu nunanit allanit suliartortitat kommunimut akileraarummik akiliisussaanngitsut taamaallaalli akileraarutigisallugit 35 procent.