Olsvig: Uranitalinnik akuersaanngilluinnarnerup aalajangiusimaannarnissaa ajornarpoq
Uranitalinnik aatsitassarsiornissamut akuersaanngilluinnarnermut IAmi isummat assigiinnginneri suli tutsiuttarput
Siullermik naalakkersuisut aamma IAmi siuttut aatsitassanut naalakkersuisoq Ove Karl Berthelsen siuttoralugu oqaatigaat, aatsitassarsiornermi uranitalinnik piiaasoqarnissaanut akuersaanngilluinnarnermik isummiussaq allanngortinneqarsinnaasoq.
Kisianni taava tunuliaquttat Inatsisartuni IAp issiatitai Aqqaluaq B. Egede siuttoralugu saqqummerput oqarlutik IA isummaminnik allanngortitsisimanngitsut. Partiip suli politikkeraa uranitalinnik piiaasoqarnissaanut akuersaanngilluinnarneq, nalunaarutigaat.
Ullumi partiimit folketingemut ilaasortaatitaq saqqummiussivoq siunissami uranitalinnik piiaasoqarsinnaaneranut marloqiusamik isummiussaqarnermik suli ersarinnerulersitsisoq.
- Siunissami uranitalinnik akuersaanngilluinnarnermik isummiussaq atuinnassallugu ajornakusussaaq pissutsit piviusut naalakkersuinermilu inissisimaneq qiviassagaanni, Sara Olsvig Informationimut ullumikkut saqqummersumut oqarpoq.