Oqaluuserisaq pillugu isumaqatigiittoqaraluartoq oqalliserujussuarneq

Malunnarsigaluttuinnarpoq Inatsisartunut qinersinissaq qanillisoq. Inatsisartunimi partiit maanna annikigisassaanngitsumik ajornartorsiuteqarput oqaluuserisartik aallaaviginagu oqaaseqarnissamut  piffissaq atorlugu imminnut isornartorsiulertarnerat, aamma tamanna pivoq ullumikkut aalisartut piniartullu ullorsiorfianni.

Oqallinnermi aqutsisuusoq  arlaleriarluni eqqissisaasaqattaarpoq oqaluuserisaq qitiutinneqartariaqartoq, allaallumi piniinnarpata oqallinnerup unitsinneqarnissaa sioorasaarutigalugu, kisianni iluaqutaanngilaq.

Silap pissusianik pissuteqartumik ajornartorsiornerni ajunaarnersuarnullu assingusuni pisuni aallarteqqinnissamut tapiissutisisinnaaneq, akiliutigineqartartut qaffanneri kiisalu qinnuteqarnermi piffissaliussat eqqunneqarnerik siunnersuut ullumi aappassaaneerneqarmat (imm. 37), illuatungeriit siunnersuut qimaqattaarlugu oqallipput, pingaartumik illuatungiliuttut aalisarnermut inatsit akuersissutigineqarnikuusoq, januaarillu aallaqqaataani atuutilersussaq qaqeqattaarpaat.

- Aap, aalajangiusimavarput aalisarnermut inatsit eqqaavimmut igissallugu, uagut pissaanermik tigusigutta, ilaatigut Nalerarmiit Jens Napãtôᴋ oqarpoq.

Aallarteqqinnissamut tapiiffigineqartarnermut inatsisip allanngortinneqarnissaanik siunnersuut

Qanorluunniilli illuatungeriit imminnut appisaluullutik oqallitsigigaluarunik, qanorluunniillu oqallinneq sakkortutisimatigigaluarpat, Inatsisartuni taakkorpiaat  isumaqatigiipput aalisartut piniartullu aammalu nunalerinermik inuussutissarsiuteqartut namminneq pisuussutigiginngisaminnik, silalli allanngornerata kingunerisaanik inuussutissarsiumminnik ingerlatsisinnaajunnaarsimasut, aningaasatigut ikiorserneqarsinnaanissaat periarfissaalissasoq.

Aalisartut amerlanerpaartaat sillimmasersimapput, taamaalillutillu inuussutissarsiutigalugu aalisarsinnaanermut piumasaqaatinut naammassinnillutik. Kisianni suli aalisartut piniartullu aammalu nunalerisut ilaqarput, sillimmasiinermut aningaasartuutissatik matussuseruminaatsillugit isertitakippallaarsimasunik. Inatsissatullu siunnersuut taanna inuussutissarsiortut taakkununnga sammisuuvoq.

Kisianni ataatsimiititaliaq isumaqatigiittoq Naalakkersuisunut kaammattuuteqarpoq tapersiissutinik qinnuteqartoqarsinnaaneranut periarfissanik misissuisoqassasoq, ilaatigut ikiorneqarsinnaanermut killissarititaasoq peersinnaanersoq. Siunnersuummi ukiumut agguaqatigiissillugu 250.000 koruunit ataallugit isertitaqarsimassasut imaluunniit aamma agguaqatigiissillugu pigisassanik 100.000 koruuninik minnerusunik peqassasut.

Kisianni Aalisarnermut Piniarnermullu Naalakkersuisoq, Kim Kielsen (S) erseqqissaavoq pisortat namminersorlutik sillimmasiisarfinnut unammillertuunnginnissaat:

- Aatsaat ajoquserneq sillimmasiinermit matussuserneqanngippat matussuserneqarsinnaanngippallu inuussutissarsiortut aallarteqqinnissamut tapiiffigineqarsinnaasut siunnersuummi ersarissumik aallaaviuvoq, inatsisinilu inissisimanermi atuuttumi ingerlatseqqiinerulluni. Taamaalilluni inuussutissarsiutip immikkoortuani nalinginnaasumik atuuttoq aallaavigalugu inuussutissarsiummi pineqartumi annaasaqarnissamik pinngitsoortitsisinnaasumik sillimmasiineq aallaavigalugu taamaaliortoqanngippallu innuttaasunut tapiissuteqartoqarsinnaanngilaq. Ilaatigut sillimasiisarfiit akornanni unammilleqatigiinnissamik tapiissutip ajoqusiinnginnissaa qulakkeerniarlugu aalajangersagaq ilanngunneqarpoq, tassa nammineq sillimmasiinerit sillimmasiisarfinnilu pineqartuni sillimatinut assigiinngitsunut aallarteqqinnissamut tapiissutit allatut periarfissaannginniassammata, Kielsen akissummini naqissusiivoq erseqqissaavoq.

Aningaasaateqarfimmik pilersitsinissamut periarfissaq

Inatsisartuni aalisarnermut, piniarnermut nunalerinermullu ataatsimiititaliap ukiumut agguaqatigiissillugu isertitat/imaluunniit aningaasaateqarnermut killiliussat peerneqarnissaannik kissaateqarnerup saniatigut, ataatsimiititaliap aamma kissaatigaa inuussutissarsiutinik pineqartunik taarsigassarsinissamut periarfissiisumik fondimik pilersitsinissamut periarfissanik misissuisoqassasoq.

- Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut allatut tapiiffigineqarsinnaanerannut periarfissat ataatsimiititaliamit oqaluuserineqarput. 

- Tassunga ilanngullugu taarsigassarsinissamut periarfissartalimmik aningaasaateqarfimmit pilersitsinissamut kiisalu inuussutissarsiummut atortutut ilusilerlugit tapiissuteqartoqarsinaaneranik ammaassisoqarnissaa oqaluuserineqarlutik. Aningaasaateqarfimmik inuuussutissarsiutigalugu aalisartunut, inuusssutissarsiutigalugu piniartunut inuussutissarsiutigalugulu nunalerinermik ingerlataqartunut taarsigassarsilluni aningaasalersuinissamut periarfissiisumik pilersitsinissamut periarfissat isumaliutigeqqullugit Naalakkersuisut ataatsimiititaliamit isumaqatigiittumit kaammattorneqarput, ataatsimiititaliaq isumaliutissiissummini erseqqissaavoq.