Paamiuni imermik tunisassiornissamut pilersaarut Las Vegasimi aningaasaliisartumit tapersersorneqartoq
Ingerlatseqatigiiffiit qulit imermik Nunatsinnit avammut tunisassiornissamut akuersissutaateqarput. Taakku ilagaat KoldCo Greenland, Paamiuni imermik tunisassiorfimminnit imermik annertuumik tuniniaarusuttoq. Aningaasaliisartoq Las Vegasimeersoq pilersaarummut soqutiginnippoq.
Ingerlatseqatigiiffiit qulit sermimik imermillu Nunatsinneersunik niuersinnaanissaminnut piffissami matumani akuersissutaateqarput. Tamatumunnga atatillugu ingerlatseqatigiiffiit marluk akuersissummik qinnuteqaateqaqqammerput. Nunanut allanut, inuussutissarsiornermut niuernermullu Naalakkersuisoqarfik aviisimut Sermitsiamut taama ilisimatitsivoq.
Ingerlatseqatigiiffiit ilaat akuersissutaateqartoq tassaavoq KoldCo Greenland ApS, 2036-p tungaanut Paamiuni imermik tunisassiorfimmit imermik avammut tunisassiornissamut akuerisaasoq. Qallunaaq eqqartuussissuserisoq Bruno Månsson ingerlatseqatigiiffimmi siuttuuvoq, peqatigalugit Canadamiut Peggy Johnson aamma Robert John Nagy, siornatigut Siku Vodkamik tunisassiortuusimasut. Taakku saniatigut Martin Sandy Shalmi, Nunatsinneersumi Xploration Servicesimeersoq pilersaarummut akuuvoq.
Imeq annertoorujussuaq
KoldCop ingerlanniakkamisut isumassarsiaani pineqarpoq ukiumut imermik annertoorujussuarmik (600.000 kubikmeterit missaanniittumik) Paamiuni umiarsualivimmit umiarsuamik assartuisarnissaq. Pilersaarut aallaqqaammut silap pissusianut atatillugu pilersaarutitut oqaatigineqaraluarpoq, silap pissusianut aningaasaateqarfinnit aningaasalersorneqartussatut imerlu avammut Afrikamut aamma Kinamut tunineqartassalluni, ikiueqqaarnermut suliniaqatigiiffiit suleqatigalugit.
Aviisimi Sermitsiami atuarnerusinnaavutit. Aviisi uani pissarsiariuk:
