Paasineqarput - RG-li aalajangiisuuvoq
Aasianni aalisartut, aalisartut atugarisaat pillugit Naalakkersuisunit paasineqarput, Aalisarnermulli, piniarnermullu nunalerinermullu Naalakkersuisoq Karl Lyberth RG-p aalajangiinerinut akulerukkusunngilaq
Tunitsivik matoqqasoq taamalu isertitaqarnissamut periarfissat pitsanngortinnissaannut periarfissakinnerulerneq, tassa Aasianni aalisartut atugassarisaat. Ilimanarluinnarporlu siunissami taamaaginnassasoq, Royal Greenland tunitsivinni ingerlataminik aalajangiisartillugu.
Tassami Aasianni pissutsit allanngortinniarlugit Naalakkersuisut akulerukkusunngillat. Taamaattumik pisanit isertitsilaarfissatuaavoq illoqarfimmi kalaalimineerniarfimmi tuniniaaneq.
Pissutsit taamaapput aalisarnermut, piniarnermut nunalerinermullu Naalakkersuisoq Karl Lyberth akissuteqareersorlu aalisartut tunisassiortullu akornanni pissutsinut inatsisartut akulerukkusunngitsut.
Aamma atuaruk: Nunaqarfinni tunitsiviit RG-p aquppai
- Erseqqissartariaqarpara suliassanut, KNAPK-p tunisassiortullu iluminni aalajangigaannut Naalakkersuisut akulerussinnaanatillu akulerukkusunngimmata, Karl Lyberth Inatsisartunut ilaasortamut Nikolaj Jeremiassenimut, Siumut, akissummini allappoq.