Grønlandsbankenimi atuisut tamarmik, atuisunngorlaat atuisutoqqallu, inuit ataasiakkaat inuussutissarsiummillu ingerlataqartut ukiup affaa sinnerlugu matuma siornat immersugassamik ”Sullitanut inuinnarnut niuernerup annertussusissaa naatsorsuutigisaq aamma akileraarutit pillugit paasissutissat”-mik qulequtalimmik nassinneqarput.
Aningaasatigut pinerlunnerit, ilaatigut aningaasanik unioqqutitsilluni, soorlu ikiaroornartumik, niuernikkut aningaasanik eqqussuineq, pinaveersaartinnissaat qulequtaani siunertarineqarpoq.
Grønlandsbankenimi atuisut tamarmik, atuisunngorlaat atuisutoqqallu, inuit ataasiakkaat inuussutissarsiummillu ingerlataqartut ukiup affaa sinnerlugu matuma siornat immersugassamik ”Sullitanut inuinnarnut niuernerup annertussusissaa naatsorsuutigisaq aamma akileraarutit pillugit paasissutissat”-mik qulequtalimmik nassinneqarput.
Aningaasatigut pinerlunnerit, ilaatigut aningaasanik unioqqutitsilluni, soorlu ikiaroornartumik, niuernikkut aningaasanik eqqussuineq, pinaveersaartinnissaat qulequtaani siunertarineqarpoq.
Maannamut „sulisartorpassuit immersugassaq immersorsimagaat“ Jimmi Johannesen, atuisunik sullissinermi pisortaq, oqarpoq.
- Aningaaseriviup aningaasanik peqquserlutsitsinermut inatsimmut tunngatillugu inatsisinik maleruaanissaanik atuisut amerlasuut paasinnilluarput, taamaammallu maanna atuisut amerlasuut immersugassaq immersorsimavaat, tamannalu qujamasuutigaarput, AG-mut allakkatigut akissuteqarluni allappoq.
Nalorninartoq
Aningaaseriviulli paasissutissanik pisariaqartunik tunniussinissamik saaffiginnissutaat pillugu atuisut akissuteqartussat tamakkersimanngimmata Netbankimi, e-mailimi allakkanulluunniit nakkartitsivinni misissuisoqassasoq Jimmi Johannesen kajumissaarivoq.
Taamaaliunngikkaanni Brugsenimi Pilersuisumiluunniit dankortimik akiliiniaraluarluni akiliisinnaajunnaartoqariaannaavoq.
Grønlandsbanken paasissutissat atuisunut tunngasut pillugit pumasaqaatit nutaat paasissutissiissutiginiarlugit annertuumik iliuuseqarsimalluni erseqqissaavoq.
- Aningaaserivik ilaatigut Netbank, Eboks imaluunniit allakkat aqqutigalugit sullitatsinnut nalunaaruteqartarnikkut tamanna pillugu paasissutissiiniarluni iliuuseqangaarsimasoq isumaqarpugut. Tamatuma saniatigut aningaaseriviup nittartagaatigut, inuit attaveqaqatigiittarfiisigut kiisalu KNR TV-mi Radiomilu ussassaaruteqartarpugut, aningaaserivimmi sullitanut pisortaq Jimmi Johannesen oqarpoq nangillunilu:
- Ajoraluartumik atuisut ilaat tamatuminnga eqqumaffiginnissimanatillu paasissutissiinitsinnik malinnaasimanngillat, taamaammallu atuisut taakkua pissutsit aaqqinneqarnissaata tungaanut inatsisit naapertorlugit atuinerminnik unitsitsigallartinneqarsinnaapput.
Inatsit pineqartoq tassaavoq “Aningaasanik peqquserlutsitsinermut pinerliiniarnernullu aningaasaliinermut pinaveersaartitsinermut inatsisip Kalaallit Nunaanni atuutilersinneqarneranik peqqussut”, 2021-mi maajimi atuutilersoq.
Tamanut ammasumik ikiuineq
Grønlandsbanken maajimi matumani Maniitsumi Nuummilu tamanut ammasumik aaqqissuussivoq, tassanilu atuisut immersugassamik immersuinerminni ikiorneqarsinnaapput.
Paasissutissiiniarlusilu ikiuiniarnissinni atuisusi immersugassamik immersuitillutik apeqqutit suut apeqqutigisarpaat?
- Apeqqutit assigiinngitsorpassuupput, atuisorpassuilli immersugassamik immersuinissaminnut ikiorneqarniarlutik Nuummi aammali sineriammi ”tamanut ammasumik ikiuinernut” peqataasartut oqaatigisinnaavarput. Aammattaaq atuisutta amerliartuinnartut paasissutissanik digitaliusunik ilisimasaqarpallaannginnertik pissutigalugu ilaquttaminnit ikinngutiminnilluunniit ikiorneqartarnerat malugisinnaavarput, tamannalu aningaaserivimmut iluaqutaaqaaq, Jimmi Johannesen oqarpoq.
Ikiorneqarnissamik pisariaqartitsigaanni aningaaseriviup nittartagaani videoliaq takuneqarsinnaasoq kajumissaarivoq, tassani immersugassaq qanoq immersorneqassanersoq sukumiisumik takuneqarsinnaavoq.
Billedtekst: Grønlandsbanken Nuummiittoq. Assi: Leiff Josefsen.
