Peqqusersusaarnermik eqqartuussut apriilimi
Pingasunngornermi apriilip sisamaanni Nunatsinni Eqqartuussiup suliffeqarfiit pingasut suliariumannittussarsiuussinerni isumaqatigiissusiortarsimanerinik eqqartuussut saqqummiutissavaa
Eqqartuussut tamanut ammasumik saqqummiunneqassaaq, Nunatta Eqqartuussivianit Birgit Skriver sisamanngornermi ualikkut nalunaarpoq.
2008 aamma 2009’mi suliariumannittussarsiuussinerni sisamani – Sisimiuni pingasut Kangerlussuarmilu ataaseq – suliassiissut Eqqartuussiviup ulluni pingasuni sammivaa.
Suliat katillutik 54,6 million koruunit miss. naleqarput.
Suliariumannittussarsiuussinerni suliffeqarfiit imminnut iluaqquserniarlutik isumaqatigiissiortoqartarsimaneranik tunngasut suliarineqarput, unammilleqatigiinnermut inatsimmi inerteqqutaammata, inatsit taanna naapertorlugu unammillerneq tunngavigalugu neqeroorusiortoqarsinnaaqqullugu.
Sanaartukkanik ingerlatsisut pingasut; Permagreen Grønland, B. J. Entreprise kiisalu Kang-Total-Byg suliami unnerluutigisaapput
Aamma suliffeqarfiup pisortaaneri Preben Kold Larsen, John Kvistgaard Eliassen aamma Jørgen Dresler Mortensen, arfineq-aappaat unnerluutigisaasoq Jeppe Rosenlund Mortensen, B. J. Entreprisemi piginneqataasoq.
Suliffeqarfiit oqarput
B. J. Entreprisep suliap ingerlanerani unnerluussutit ilaat nassuerutigai, Permagreen unnerluussutit tamaasa nassuerutigai, akerlilerluguli neqeroorutit aaqqissuunneqartartut qulakkeerumallugu kikkut suliassamik tunineqassanersut, Kang-Total-Byg tamaginni pinngitsuunerarpoq.
Unnerluussisussaatitaasut piumasaraat suliffeqarfik Sisimiuneersoq B. J. Entreprise 3,9 million koruuninik akiliisinneqassasoq.
Akiligassap angisussusaanut pissutsit pingasut tunngaviupput aamma inatsisaatsuliornerit ukiup ataatsip iluani ingerlasimanerat.
Permagreen Grønland 1,7 millioner koruuninik akiligassinneqarnissaa piumasarineqarpoq, soorlu Kang-Total-Byg amerlaqataanik akiligassinneqarnissa kissaatigineqartoq.
Unnerluussisussaatitaasut piumasaraat inuit unnerluunneqartut tamarmik 25.000 koruuninik akiligassinneqarnissaat.
Unnerluunneqartunit sisamanit pingasut eqqartuussinerup aallartinnginnerani isumaqatigiissusiortarsimanerit pillugit ilisimasaminnik politiinut oqaluttuarput, tamakkua tunngavigalugit suliassaq alliartuaarsimavoq tamatumali saniatigut paasissutissanik ilisimatitsinertik pissutigalugu, pineqaatissinneqarneri annikillisaavigineqarput.
Inatsit pineqaatississuummik pinaveersaartitsivoq
Unammilleqatigiinnermik inatsip siunertaraa inuit aamma suliffeqarfiit isumaqatigiissusiorluni suleqatigiittarsimanermik nassueruteqartut pineqaatissinneqartassanngitsut. Illersuisut saqqummiussinerminni killormoortua tikkuarpaat, akiligassinneqarnissamik piumasaqaatit qaffasippallaartut, pingaartumik Danmarkimi eqqartuussinerni siusinnerusukkut pisunut assersuutissagaanni, taamalu uppernarsaatit nalingi tikkuarneqarlutik, suliat ilaanni aningaasanik iluanaaruteqartoqanngimmat.