Permagreen: Kommuni pisiaqarniartutut allatulli neqeroorfigineqarsimavoq
Kommuneqarfik Sermersooq inissiarsuarnik 99 millioner koruuninik nalilinnik pisiaqarnissamut akuersaarsimanngitsuuppat, Permagreenip inissiarsuaq allamut tunisimassagaluarpaa, pisortaaneq oqarpoq.
Ingerlatsisimanermik misissuisoqarmat Kommuneqarfik Sermersuup kommunimi ineqarnermut tunngatillugu ingerlatsisimanera sakkortuumik isornartorsiorneqarpoq, isornartorsiorneqartullu ilagaat, kommunimi pisortaasimasut marluk kommunip inissiaatileqatigiiffianik tatisillutik namminersortup inissialiorneranut peqataatitsilersimanerat.
Deloittep misissuisimanerminik nalunaarusiaa Iserimmilu pisortaaneq naapertorlugit, Permagreenip suliniumminut tamarmiusumut aningaasalersuinissamut periarfissagissaarnerulernissaa anguniarlugu Iserit suliniummut peqataatinneqalersimavoq.
Iserimmi pisortaanerup nangaanartoqartissimavaa Iseriup peqataatinneqarniarnera, Iserimmi politikkerineqartoq naapertorlugu inissiat pisiarineqartussat akisuallaaqimmata.
Permagreenimi pisortaanerup Jeppe Bloch Steffensenip Sermitsiaq.AG-mut oqaatigaa, kommunip tapiissuteqarsimanera suliniutip naammassineqarnissaanut aalajangiisuusimanngitsoq.
Apeqqut: Kommuni 99 millioner koruunininik nalilinnik pisiaqarnissamut qulakkeerinnitsinnagu sooq suliniutigisarsi nammineerlusi aningaasalersorsinnaasimanngilisiuk?
- Suliniutigineqartumi sanaartukkat tamarmik tunineqarnerisigut aningaasalersorneqartarput. Kommuni pisiaqartut arlallit ilagiinnarpaat, sanaartukkallu tamarmik tunineqareersimallutik. Kommuni pisiaqarsimanngitsuuppat, sanaartugaq pisiniartumut allamut tunineqarsimassagaluarpoq, soorlu sanaartukkat allat sisamat tunineqarsimasut, Jeppe Bloch Steffensen allakkatigut akissuteqarluni allappoq.
Suliamut ilanngunneqarsimanertik ajuusaarutigigaa
Deloitte misissuisimanerminit nalunaarusiamini inerniliivoq, pisortat tapiissuteqarsimanerat inuussutissarsiuteqartumut inerteqqutaasumik tapiissutaasimasinnaasoq, kommuni suliniummut ilanngunnermigut Permagreenimut tapiissuteqarsimammat.
Pisortaanerup ajuusaarutiginerarpaa, Permagreenip suliamut, kommunip allaffissornerani pissutsinut kusananngitsunut ilanngunneqarsimanera, suliffeqarfimmilli pissutsit pineqartut ilisimaneqarsimanngitsut oqaatigalugu.
Apeqqut: Misissuisimasup naliliinermini, inuussutissarsiuteqartutut inerteqqutaasumik tapiiffigineqarsimasinnaanissinnik oqaaseqarnera qanoq isumaqarfigaajuk?
- Taamaattoqarsimanngitsoq oqaatigisinnaavara. Kommuni inissianit tallimaasunit ataatsimik pisiaqarsimavoq. Kommuni pisiaqarsimasut allat kvadratmeterimut akigititamut akiliutigisimasaannik akiliuteqarsimavoq. Tassa niuerfimmi akigitinneqartoq malillugu akiliuteqarsimavoq, Jeppe Bloch Steffensen oqarpoq.
- Pisortanut tatisisinnaanngilagut
Apeqqut: Suliffeqarfittut kommuni sanaartornermut aningaasaliissuteqaqataatinniarlugu piumaffigisimavisiuk?
- Naamerluinnaq. Kommuni pisiaqarniartunut allanut assigusumik neqeroorfigineqarsimavoq. Suliffeqarfittut pisortanut tatisinissamut tunngavissaqanngilagut. Suliniutip aallartisarneqarneranut atatillugu niuerfimmi pisiaqarsinnaasunik misissuinermi kommuni taamaallaat saaffigineqarsimavoq.
Apeqqut: Misissuisimasoq suliap ingerlanneqarsimanera pillugu ilaatigut allassimavoqt: "Isumaqatigiissutip takutippaa, kommunimi aqutsisut sanasup suliniummik naammassinninnissaanut ikiuukkusussimasupilussuit." Permagreeni kommunimi pisortaasimasunut qanimut attaveqarluartartuua?
- Naamik taamaaattoqartannginnera aamma oqaatigisinnaavara. Permagreenimit suliffeqarfiup suliniutaanut atatillugit kommunimi pisortaasimasut taamaallaat allaqatigineqartarput, pissusissamisoortumik, suliassamut attuumassuteqartunik ilisimasaqartumillu allaqatigineqartarlutik. Aaamma isumaqatigiissutitigut Permagreenip ikiorserniarneqarsimaneranik oqaaseqaatigineqarsimasoq paasisinnaanngilara. Kommuni inissiarsuarmik pisiaqarusussimavoq, aalajangersimasumilli pisiaqarnissamik kissaateqarsimanani. Tamanna isumaqatigiissummut naapertuuppoq, Jeppe Bloch Steffensen oqarpoq.