Peter Borg Kujataani annertuumik naatsorsuuteqarfigineqartoq

Aalisarnermut, Piniarnermut Nunalerinermullu Naalakkersuisunngortoq Peter Borg Demokraatineersoq, qanittukkut Kujataani angalavoq, ilaatigullu aalisarnermik inuussutissarsiuteqarneq ukiorpassuarni unammilligassarpassuaqarsimasoq siuarsarniarlugu aalisarnermik inuussutissarsiuteqartut ataatsimeeqatigai.

Siornatigut aalisartuusimavoq Kujataanilu ilisimaneqarluarluni – aalisarnermillu inuussutissarsiuteqartunit ataqqineqarpoq, taakkunanngalu annertuumik naatsorsuutigineqarpoq.

Unittoorsimasoq 

Kujataani sinerissap qanittuani aalisarneq ukiuni kingullerni ajornartorsiungaatsiarpoq. Tamanna pissutigalugu aalisartut peqatigiiffii aamma Kommune Kujalleq aalisarnermik inuussutissarsiuteqarneq eqqortumut ingerlateqqinniarlugu politikkikkut annertuumik suliniuteqartoqassasoq Naalakkersuisunut 2022-mi piumasaqarput. Taamaammat taamanikkut Aalisarnermut Piniarnermullu Naalakkersuisup Karl Tobiassenip, Siumut, aalisarnerup ineriartortinnissaanut periarfissat immikkut ukkatarilerpai, ukiorlu taanna marloriarluni Kujataanut tikeraarluni. Tamatuma kingorna aalisarnerup ineriartortinneqarnissaanut tapersersuisumik arlalinnik suliniuteqartoqassasoq Naalakkersuisut aalajangerput. Tamatumunnga atatillugu Naalakkersuisut suleqatigiissitanik pilersitsipput, taakkulu Kujataani aalisarnermik piniarnermillu inuussutissarsiuteqarneq ineriartortinniarlugu pilersaarusiussallutik, tassani Kommune Kujalleq, Innovation South Greenland, KNAPK, tunitsiviit aamma aalisartut piniartullu peqatigiiffiinit sinniisut peqataassapput.

Tamanna pissutigalugu Anders Olsen Siumumeersoq ilaatigut suliniutit qanoq inissisimanersut paragraf 37 naapertorlugu Naalakkersuisunut apeqquteqarpoq. Najukkamiit isumassarsianik pissarsisoqarsimanngimmat suliniaqatigiit uninngasimasut Peter Borgip tamatumunnga atatillugu ilisimatitsissutigaa. Naalakkersuisup - Kujataani pissutsinik ilisimasaqarnini tunngavigalugu - aalisarnermik inuussutissarsiuteqartut isumassarsiaannik naalakkersuisoqarfiminit aallartinneqarsinnaasunik tapersersorneqarsinnaasunilluunniit pissarsiniarluni aamma oqaatigaa.

Angut ataqqinartoq 

Aalisarnermik inuussutissarsiuteqartut aalisarnermik inuussutissarsiummik ineriartortitsinissamut periarfissat pillugit oqaloqatigineqartalernissaat Siumup Demokraatillu Kommune Kujallermi naalakkersuisooqatigiinnissamut isumaqatigiissutaanni politikkikkut anguniagaasa ilarigaat Anders Olsenip erseqqissarpaa.

- Aalisarnermik inuussutissarsiuteqarnermi pissutsit ilungersunartut maanna atuuttut ilisimavagut. Taamaammat piffissami aggersumi Kujataani aalisarneq pillugu isumasioqatigiissitsinissaq sulissutigissavarput, Anders Olsen oqarpoq, taannalu aamma Kommune Kujallermi borgmesterimut siullertut tullersortaavoq.

Naalakkersuisut suleqatigiissitanik pilersitsisimanerat ilisimasimanagu Jens Peter Kielsen, Qaqortumi aalisartut piniartullu peqatigiiffianni QAPP-mi siulittaasoq, oqarpoq.

- Siornatigut naalakkersuisuusimasut Kujataanilu aalisarnermik ingerlatsisut akornanni oqaloqatigiinneq amigaataavoq. Aalisarnermut piniarnermullu naalakkersuisunngortoq, ilisarisimalluagarput, pitsaasumik ataatsimeeqatigeqqammerparput.

- Kujataani aalisakkat tunitsivinni akii appasissut, aamma silap pissusaanut pissutaasumik piniartunut aalisartunullu upernaakkut sikorsuaqartarnera pissutigalugu sivisunerusumik aalisarsinnaasanngitsunut ajunaarnersuaqartillugu ikiorsiissutinik amigaateqarneq pingaarnertut oqaluuserineqartut ilagaat.

- Peter Borg ataqqinarpoq, taamaammat Kalaallit Nunaanni aalisartut piniartullu tamarmik naligiissumik atugaqarnissaat sulissutigiumaaraa naatsorsuutigilluinnarparput, QAPP-mi siulittaasoq oqarpoq.

Kujataani sinerissap qanittuani aalisartut amerlanersaat maannakkut saarullinniarput.

Isumalluarfigineqartoq

Peter Borgip angalanerminut atatillugu Hentzar Petersen, Arctic Prime Fisheries ApS-imi Nanortalimmi, Qaqortumi Kuummiunilu aalisakkeriviusunik piginneqataasoq pisortaanerlu, ataatsimeeqatigaa.

- Peter Borgilu immitsinnut ilisarisimalluarpugut taannalu siornatigut tunisassiorfitsinnut tunisisarsimavoq. Kujataani pissutsit ilisimalluarpai, taamaammat annertuumik naatsorsuuteqarfigaara.

- Aalisarnermut inatsit allanngortinneqartariaqarnersoq politikkerit eqqartorsimavaat, taamaammat qanoq aalajangiisoqassanersoq utaqqivarput, oqarpoq, erseqqissarlugulu aalisarnermut inatsit nutaaq Arctic Prime Fisheries ApS-ip ingerlatsineranut akornutaasimanngitsoq, Kujataani aalisarnermik ingerlatseqatigiiffiit annersaanni pisortaq oqarpoq.

Arctic Prime Fisheries Kujataani siorna 2.257 tonsinik pisassinneqarsimasoq 2025-mi 2.309,5 tonsinik saarullittassinneqarpoq. Tamatuma saniatigut Tunumi ukioq manna 8.710,9 tonsinik saarullittassinneqarlunilu, 777,1 tonsinik suluppaagartassinneqarlunilu 92 tonsinik itisoormiunik suluppaagartassinneqarpoq.

Saarulliit minnerusut 

Saarulliit tunisassiorfinnut tulaanneqartut Hentzar Petersen naapertorlugu mikinerulersimapput.

- Saarulliit tunisat siornamut sanilliullugit pitsaanerulaarput, saarulliilli angivallaanngillat. Angissusaalli ukiut tamaasa assigiinngissuteqartartut misilittakkatta takutippaat, taamaammat aappaagu pitsaanerulissasut neriuutigaarput.

- Saarulliit angissusiat nuannaarutiginngikkaluarlugu tulaanneqartartut amerlinerat aalisakkerivitsinni suliffissanik pilersitsivoq, tamannalu naammagisimaarparput, taanna oqarpoq.

Qaqortumi tunisassiorfimmi sulisut qulit sinnilaarlugit amerlassuseqarput. Nanortalimmi tunisassiorfik maannakkut ingerlalluarpallaanngilaq, Hentzar Petersenilli tunisataggustimi septembarimilu amerleriarumaartut naatsorsuutigaa.