Piginnittuunermut najoqqutassiaq kingusinaarujussuartumik piariilersoq
Naalakkersuisut aqutsinermi najoqqutassiaannik, Namminersorlutik Oqartussat piginnittuunermut politikkiannik nassuiaateqarnissamik siunertaqartumik, Namminersorlutik Oqartussat ingerlatseqatigiiffiutaat ukioq manna tunineqarnissartik kiisami naatsorsuutigisinnaavaat, tamanna Royal Arctic Linep ataatsimeersuarnerani Naalakkersuisut siulittaasuata nalunaarutigaa.
Namminersorlutik Oqartussat ingerlatseqatigiiffiutaanni piginneqataanermut politikki qanoq ingerlanneqartassanersoq pillugu, ukioq manna aqutsinermi najoqqutassiaq saqqummiussinnaassallugu Múte B. Egedep naatsorsuutigaa
Leiff Josefsen
Namminersorlutik Oqartussat ingerlatseqatigiiffiutaat pillugit siunissami piginneqataanermut politikki pillugu marsimi 2023-mi isumaqatigiissuteqartoqarpoq. Ukioq ataaseq qaangiuttoq malittarisassat ilaat suli suliarineqanngillat.
Ukioq mannali suliarineqassapput.
Ingerlatseqatigiiffiit suleqatigalugit aqutsinermi najoqqutassiap atuutilersinneqarnissaa qilanaaralugu, RAL-ip ataatsimeersuarnerani Múte B. Egedep oqaatigaa.
Najoqqutassiaq
“Ingerlatseqatigiiffiit nukittuumik aalajaatsumillu sinaakkuteqalernissaata” qulakkeerneqarnissaa, tamatumalu saniatigut piginnittuunerup qanoq aqunneqarnissaanut "najoqqutassiaqalernissaat" Múte B. Egedep kissaatigalugu ilisimatitsivoq.
Najoqqutassiaq taanna ileqqorissaarnermut najoqqutassiatut atorneqassaaq, ilaatigut ingerlatseqatigiiffiit pisussaaffiinut tunngatillugu naatsorsuutit, taakkualu piviusunngortinnissaannut qanoq iliuuseqassanersut nassuiaatigineqassapput.
