Pilersuisup akigititaanut KNI illersuisoq
Pilersuisumi nioqqutissat akii nunarsuarmi akigititanut malinnaatinneqartut, KNI-mit politikkerimut oqaatigineqarpoq.
Pilersuisoq Rema1000-imik isumaqatigiissuteqarmalli Pilersuisumi nioqqutissat akisunerulerlutillu ajornerulersimapput. IA-mi politikkeri Kristian Jeremiassen tamanna pillugu Naalakkersuisunut arlalinnik apeqquteqarsimasoq taamatut isornartorsiuivoq.
- Pittaaneruvoq REMA-mi pisiassat Pilersuisumi nioqqutissaasivinniik peerneqarpata siornatingullu pisiassaasimasut pisiassaaqqilerlutik. Ajorpoq ajorluinnarpoq pisiassat ajornerulerneri akisunerulerlutillu, Kristian Jeremiassen allappoq.
Namminersorlutik Oqartussat suliffissuaataat KNI, pisiniarfinnik Pilersuisunik piginnittoq Naalakkersuisunit akissuteqartinneqarsimavoq, KNI-millu ajornerulertoqarsimaneranik oqaaseqarsimaneq isumaqatigineqanngilaq:
Nioqqutissat normui ikinnerusut
- Nioqqutissat normuisa ikilinerat ilumoorpoq, tamannali ajornerulersitsinermik isumaqartariaqanngilaq. Qinigassat pigeriikkatta assigaat, kisiannili REMA1000-imut nuunnitsinnut atatillugu periusissiatut aalajangiupparput, qinigassat amerlassusiinik ikilisitsiniarluta. Tamatumani nioqqutissanik eqqortunik atugassiisinnaanitta pitsaanerulernissaanik qulakkeeriniarluta, minnerunngitsumillu Pilersuisumi kasiiliisarnerit ikilisinniarlugit taamaaliorpugut, KNI allappoq.
Pilersuisup nunami pisiniarfii katillutik 64-iupput, KNI-millu nioqqutissat akisunerulersimanerarneqarnerat akerlilerneqarpoq.
- REMA1000-imut isumaqatigiissuteqarneq tunngavigalugu akitsuisoqanngilaq — nioqqutissarpaaluimmi akikinnerulersimapput. Negeroorutegartitsinitsinnut atatillugu akit annertuumik misissueqqissaarfigaagut, tassanilu tunngavigineqartut ilaattut REMA1000 pitsaanerpaatut inissisimavoq, KNI-mit oqaatigineqarpoq.
Akit qaffanneqannginnissaannik neriorsuisinnaanngitsoq
KNI-lli akit qaffanneqassanngitsut neriorsuutigisinnaannginnerarpaa, Kalaallit Nunaanni akigititat nunarsuarmi niuernermi akigititanit sunnerneqartarmata.
KNI-milli oqaatigineqarpoq, akit ingerlaavartumik misissoqqissaarneqartartut:
- Akit ingerlaavartumik misissoqqissaartarpagut, tassanilu Pilersuisumi akigititaasut Brugsenip aamma Pisiffiup akigititaanut sanilliuttarpagut, taakkunanilu takutinneqarpoq, akigititagut tamatigut niuernermut naleqquttuusartut. Kiffartuussinermut isumaqatigiissut naapertorlugu ukiumoortumik akigititagut Inuussutissarsiornermut Suliffeqarnermullu Naalakkersuisoqarfimmut nalunaarutigisarpagut. Taamaaliornitsigut Pilersuisumi akigititatta sullitatsinnut pisariaqanngitsumik ajoqutaasumik qaffaaginnartarnissarput qulakkeerniartarparput.