Piniartut ikiorserneqarnissaat pillugu atsiornernik katersisoqartoq
Avannaani piniartut qaammatini arlalinni isertitaqarsimanngitsut aningaasaqarnikkut ikiorserneqarnissaat pillugu innuttaasut arlallit atsioqataaffigereersimalerpaat.
Maannamut innuttaasut 60-it inulaarlugit amerlassusillit Avannaani piniartut ikiorserneqarnissaat pillugu atsioqataasimapput.
Atsiornernik katersuineq decemberip 30-ani 2023 aallartippoq. Skrivunder.net-imi piniartut sikkorlunnera pissutigalugu isertitaarulluinnarsimasut tapersersorneqarnissaat pillugu atsiornernik katersisoqarpoq.
Piniartut silaannaap allanngoriartornerata kingunerisaanik isertitakinnerulernertik pissutigalugu aningaasatigut ikiorserneqarnissamik qinnuteqarsinnaalereerput.
Namminersorlutik Oqartussat maannamut qinnuteqaatinik 300-nit amerlanerusunik tigusaqarsimapput, taakkulu inatsit naapertorlugu aningaasaqarnermut ataatsimiititaliamit suliarineqassallutik isummerfigineqarlutillu.
Sikkorlunnerani aningaasarsiunngitsut
Maanna inuit kinaassutsiminnik isertuussisut piniartut aningaasarsiorsinnaajunnaartut pillugit atsiornernik katersipput. Innuttaasut arlallit piniartut misiginneqatigalugit atsioqataasimapput, piniartut decemberilli aallartinnerani aningaasatigut ikiorserneqarnissaat inissaminiittutut ilaatigut oqaasertalerlugu.
Piniartut isertitaqarpiarunnaarnerat Sermitsiaq.AG-p siusinnerusukkut allaaseraa.
Savissivimmi piniartut oqaluttuarput imaq sikusimanngimmat novembarip aallartinneraniilli isertitaqarpiarunnaarsimallutik. Piniartut kaperlatsillugu taarpallaartaqimmat umiatsiamik aallarsinnaanngillat, sikusimanngimmallu qimussimik piniarnissaq aalisarnissarluunniit periarfissaanani.