Pisassiissutinik agguaassineq isornartorsiorneqartoq

Aalisarnermik inatsisip ukiortaamiit atuutilerneranut atatillugu aqutsiveqarfik 47-mi, tassa Qeqertarsuup Tunuani, Uummannami Upernavimmilu qaleralinniarluni aalisarnermi umiatsiaararsortut paggatassiissutinik aalisaannassanerlutik imaluunniit Pisassiissutinut Niuerutigineqarsinnaasunut Nammineq Pigisanik, PNNP-nut, ikaarsaassanerlutik aalajangersinnaanngorpaat. 

Immikkoortunullu taakkununnga marlunnut pisassiissutit qanoq agguarneqarsimanersut piffissami sivisuumi utaqqineqareersorlu Aalisarnermut, Piniarnermut, Nunalerinermut Imminut Pilersornermullu Naalakkersuisoqarfimmiit kisitsisit sapaatip akunnera kingulleq saqqummiunneqarput.Tassanilu PNNP atorlugu aalisartunut pisassiissutit, paggatassiissutinut naleqqiullugit amerlanerujussuusut erserpoq. Tamannalu aalisartuniit uissuummissutigineqarpoq. Taamaattumik aasap ukialluunniit ingerlanerani qaleralinniarluni aalisarnermi paggatassiissutit nungunnissaat aalisartut ernummatigaat.

PNNP amerlanernik tunineqartoq

Umiatsiaararsiorlutik aalisartut 450-it aqutsiveqarfik 47-mi PNNP-nut ikaarsaarsimanerannut atatillugu, PNNP-mik paggatassiissutinillu aalisartut akornanni aqutsiveqarfiit immikkoortuinut tamanut agguaassinermi najoqqutassamik nutaamik Naalakkersuisut aalajangersaapput. Ukioq manna katillugit 29.550 tonsit pisassiissutigineqarput, taakkunannga 23.647 tonsit PNNP atorlugu aalisartunut, kiisalu 5.903 tonsit paggatassiissutinik aalisartunut tunniunneqarlutik.

Upernavimmi PNNP atorlugu aalisartunut 6.387 tonsit, paggatassiissutillu 2.913 tonsit pisassiissutigineqarput, Uummannamilu PNNP atorlugu aalisartunut 7.720 tonsit, paggatassiissutillu 1.930 tonsit pisassiissutigineqarlutik, kiisalu Qeqertarsuup Tunuani PNNP atorlugu aalisartunut 9.540 tonsit, paggatassiissutillu 1.060 tonsit pisassiissutigineqarlutik.

Pisassiissutit nikerassasut

Agguaassinermi najoqqutassaq allanngorartuuvoq, ukiullu tamaasa aqutsiveqarfiup 47-p immikkoortuini pingasuusuni umiatsiaararsortut kajumissutsimik PNNP-mut nuuttut tunngavigalugit allanngortassaaq. Pisassanik taamatut agguaassineq, aqutsiveqarfik 47-mi PNNP-mik paggatassiissutinillu aalisarnerit akornanni pitsaanerpaamik oqimaaqatigiissitsissangatinneqartoq, PNNP-millu aalisartut pitsaanerpaamik atugaqarnissaat, kiisalu umiatsiaararsortut isertitaqarnerulersinnaalernissaat qulakkeerniarneqartoq, Naalakkersuisut paasissutissiipput.

Aqutsiveqarfik 47-mi aalisarsinnaanermut akuersissutaatillit PNNP-mik paggatassiissutinilluunniit aalisartut, aqutsiveqarfinni pingasuni tamani aalisarsinnaanngorput.

Aalisarnerit aalisarnermi pisassiissutit niuerutigineqarsinnaasut pillugit aaqqissuussamiittut, Namminersorlutik Oqartussat PNNP pillugu nalunaarutaani paragraf 11 naapertorlugu, paggatassiissutinik aalisartut TAC-p, tassa pisassiissutit tamarmiusut, minnerpaamik 5 procentianik qulakkeerunniarlugit PNNP-mut nuussinnaaneq matuneqassanersoq pillugu saqqummiisoqartassaaq.

Sinerissap qanittuani aalisarnermi pisassiissutinit qaqinneqartunut agguataarinermut najoqqutaq, Kalaallit Nunaanni Aalisarnermut Piniarnermullu Nakkutilliisoqarfiup KANUAPNA-p nittartagaani takuneqarsinnaavoq.

Ajorluinnartumik kinguneqarsinnaasoq

Ilulissani umiatsiaararsortoq Erik Lange, aamma siornatigut Sinerissap Qanittuani Aalisartut Piniartullu Kattuffianni, SQAPK-mi pisortaasimasoq, paggatassiissutinik aalisaannassalluni aalajangersimavoq. Pisassiissutillu agguaanneqarnerat taassuma tupaallaatigaa.

- Paggatassiilluni aalisarnermut pisassiissutit taamak ikitsigineri tupinnarlunilu tupaallannarpoq. Qeqertarsuup Tunuani aalisarneq ingerlalluartarmat, paggatassiissutit 1.060 tonsiusut julip ingerlanerani nungunnissaat ilimanarpoq.

- Pisassissuutit taamatut agguaanneqarsimanerat eqqarsaatigilluagaanngilaq, tamannalu ukiup ingerlanerani aalisartut ilaqutaasalu inuuniarnikkut atugarliornerulernerannik kinguneqassaaq.

- Aalisartunik ikilisaanissaq siunertaanngitsoq Naalakkersuisut oqaatigisarpaat, kisianni pisassiissutinik maannakkut agguaassineq aalisartut siunissami aalisartut ikinnerulernissaannik siunertaqartoq takusinnaavarput, taanna oqarpoq.

Ajunaarnersuartut ittumik nalaataqartoqassanngippat paggatassiissutit amerlineqartariaqartut, Erik Lange isumaqarpoq.

Pisassiissutit nungunnissaat ilimanartoq

Ole Møller Uummannami aalisartut piniartullu peqatigiiffianni aningaaserisuuvoq, taannalu PNNP atorlugu aalisalernikuuvoq.

- Uummannap eqqaa sikuerpoq ammassaallu neqitassatut atorneqartartut takkutilerput, pisarnertullu aalisarnerup uummaarissumik ingerlanissaa naatsorsuutigaara.

- Taamaattumik paggatassiissutinik aalisarnerup qaammatini tulliuttuni qanoq ingerlanissaa pissanganarpoq.

- Aalisarnerlu pitsaasumik ingerlassappat PNNP atorlugu aalisartut pisassaatiminnik amikkitsoorartarsinnaanerat ilimanarpoq, taanna oqarpoq.

Umiatsiaararsortut PNNP atorlugu aalisarnermut ikaarsaarsimasut pisassaatiminnik tuniniaasut piffissami kingullermi amerliartortut, taassuma ilanngullugu oqaatigaa.

Avannaani aalisartut amerlanerulissasut

Naajaani umiatsiaararsortoq Aqqaluk Semionsen PNNP atorlugu aalisarnermut ukioq manna ikaarsaartunut ilaavoq. Qeqertarsuup Tunuani paggatassiilluni aalisarnermut 1.060 tonsit pisassiissutigineqartut nunguppata, tamaani aalisartut Uummannamut Upernavimmullu aalisariarnissaat naatsorsuutigineqarsinnaasoq, taanna oqarpoq.

- Qeqertarsuup Tunuani pisassiissutit ima ikitsigipput, taakku nunguppata tamaani aalisartut avannamut aalisariarnissaat ilimanarluni. Sumiiffimmi aalajangersimasumi aalisartut amerlanerulerpata pisassiissutit sukkasuumik aalisarneqalissapput.

- Taamaattumik aqutsiveqarfik 47-mi paggatassiissutit ukiap ingerlanerani nungunnissaat qularnanngilaq, taanna oqarpoq.

Paggatassiissutit ukiut ingerlanerini ikilisikkiartuaartinneqarnissaat politikkikkut anguniarneqarpoq, taamaattumillu PNNP atorlugu aalisarnissaq orniginartippallaanngikkaluarlugu taanna qinertariaqarsimallugu Aqqaluk Semionsen oqarpoq.

PNNP-mik aalisartut umiatsiaararsortunit angallatersortunillu Pisassiissutinik Niuerutigineqarsinnaasunik Nammineq Pigisalinnit peqataaffigineqarpoq.