Pisassiissutit killilerneqarpata Niisa aamma Sikuaq Trawl eqqugaassapput
Aalisarnermut inatsisissatut siunnersuummi nutaami pisassiissutit qummut killilerneqarnissaannut Polar Seafood kisimi eqqugaassanngilaq. Ilaqutariit Christensenikkut Niisa Trawlimik aamma Sikuaq Trawlimik piginnittut aamma eqqugaassapput.
Annonse
Carl Christensen, kilisaatileqatigiiffinni taakkunani marlunni pisortaasoq, politikerinut kaammattuutigaa aalisarnermut inatsimmi nutaami pisassiissutit qaffasinnerpaaffiat allanngortinneqartariaqartoq, taamaalilluni suliffeqarfiit taakku marluk Kitaani sinerissap qanittuanilu avataasiorluni raajartassaat pinngitsaaliissutaasumik tuniniarneqassanngimmata.
- Niisa Sikuarlu ukiorpassuarni aningaasatigut ingerlalluarput inuiaqatigiillu aningaasaqarnerannut annertuumik tapeeqataallutik. Ingerlatseqatigiiffiit taakku inuppassuarnut suliffissanik pilersitsisimapput attatiinnarlugillu ingerlalluarnissaminnullu aningaasaliisarsimapput, Carl Christensen tunngavilersuivoq.
Ilaqutariit ingerlatseqatigiiffiinut pisassiissutinut killiliussat 15 procentit tikittariaqaraat, taanna kaammattuivoq. Maannakkut Niisap Kitaata avataani raajartassanit 13,365 procentit pisassarai, ullumikkut killigitaasoq tassaasoq 33 procentit, aammalu Sikuap Kitaata sineriaata qanittuani raajartassanit 14,471 procentit pigalugit, ullumikkut killigitaasoq tassaasoq 15 procentit.
- Aalisarnermut inatsisip allanngortinnerata kingunerisassaanut ilaavoq siunissami ingerlatseqatigiiffiup aalisartuisa aqumiuisalu tamakkiisumik suliassaqartinneqarsinnaanerisa qulakkiivissorneqarneqarsinnaajunnaarnissaat. Aammattaaq aarleqqutigineqalerpoq siunissami aningaasaliissutaasussatut pilersaarutit kinguartitiinnarneqarnissaat, aammalu inuiaqatigiinnut kalaallinut aningaasaqarnikkut iluanaarutaasartut appariartornissaat, pisortaq oqarpoq.
Akunnermiliuttut ernummatigigaat
Aamma ernummatigineqarpoq inatsisip allanngortinneqarnerata kingunerisaanik ingerlatseqatigiiffiit ilaasa ingerlatseqatigiiffinnik allanik piginneqataaffiginnittarnerunissaat, Carl Christensen isumaqarpoq, taassumalu erseqqissarpaa Kalaallit Nunaat aalisarnermik inuussutissarsiuteqarnermut tapersersuinissamut naammattumik aningaasaateqareersoq nalorninartorsiorfiusunik ilisimasaqarluartunillu.
Taamatut pisoqarnissaanut mianersoqqusivoq isumaqarlunilu akuerineqarsinnaanngitsoq pisuussutit pingaarutillit, soorlu saarullittassiissutit annersaat, nunanit allanit aqunneqarpata, naak Kalaallit Nunaanni aningaasaatit pigineqareeraluartut.
- Aporfiit taamaattut tunngavigalugit Carl Christensenip kajumissaarutigaa aalisarnermut inatsisissami sukaterissutaasussat nalilersoqqinneqassasut, taamaaliornikkut qulakkeerumallugu Kalaallit Nunaanni aalisarneq ullumikkutut imminut akilersinnaasumik ingerlassasoq, inuiaqatigiinnut aningaasaqarnermullu tarpertaalluarluni, suliffeqarfiit ilaqutariinnit pigineqartut taama oqariartuuteqarput.
